Bostandyq aýdanynda qala turǵyndary men qonaqtary 125 alma aǵashyn otyrǵyzdy
Bostandyq aýdanynda barlyǵy 400 jasyl jelek otyrǵyzyldy: 125 alma, 25 qaraǵaı jáne 250 buta.
Kóshetter úsh jerge egildi: Tuńǵysh Prezıdent saıabaǵy, ál-Farabı-Sadyqov kóshesi jaǵynda, Abaı dańǵylynyń bólý jolaǵy jáne Ǵabdýllın kóshesiniń boıynda.
İs-sharaǵa elimizdiń eńbek sińirgen qaıratkerleri, álem chempıondary, blogerler, qazaqstandyq estrada juldyzdary, aýdan belsendileri men bastamashyl turǵyndardy qosqanda 780-den astam adam qatysty.
Kúıshi-dombyrashy Aıgúl Úlkenbaeva mundaı mańyzdy is-sharaǵa qatyspaı, úıde jata almaǵanyn aıtty.
«Bul turǵyndar, tabıǵatty aıalap, baǵasyn biletinder úshin mańyzdy oqıǵa. Búgin biz osyndaı ıgi iste bas biriktirip, Almatyny odan saıyn kórkeıtemiz!», - dedi ol.
Aksıaǵa qala turǵyny, bloger jáne ánshi Malıka Esmuhanbetova atsalysty.
«Qalamyzdyń odan da ádemi ári jaıqaltýǵa úles qosqanyma qýanyshtymyn. Ár aǵash biz úshin, tabıǵat úshin mańyzdy. Bárimiz osylaı jınalǵanymyzǵa qýanyshtymyn. Qazaqstanymyz órkendeı bersin!»,- dedi ol.
Qala turǵyndary úshin merekelik kóńil-kúıdi qoldaý maqsatynda aýdannyń shyǵarmashylyq ujymdarynyń qatysýymen konsert uıymdastyryldy.
Esterińizge sala keteıik, aksıa barysynda 8 myńnan astam aǵash otyrǵyzyldy, onyń ishinde 4 myńnan astamy alma. «Qaraǵaıly ormany» saıabaǵynyń aýmaǵynda 500 alma jáne órik kósheti, «ALA» saıabaǵynyń aýmaǵynda 2270 kóshet jáne Boraldaı ózeniniń boıyndaǵy baqylaý alańynda 1000-ǵa jýyq kóshet otyrǵyzyldy.