Almaty sırkiniń ártisteri Gınnestiń rekordtar kitabyna endi
Otandyq sırk óneri úshin naǵyz jeńis. Almaty sırkiniń ártisteri, áıgili «SERBAT» akrobatıkalyq tobynyń músheleri – Batyr Januzaq pen Marlen Maratov Mılandaǵy bedeldi «Lo Show Dei Record» halyqaralyq shoýynda biregeı rekord ornatyp, Gınnestiń rekordtar kitabyna endi. Bul týraly Almaty qalasynyń óńirlik komýnıkasıalar qyzmetiniń baspasóz konferensıasynda rekordsmenderdiń ózderi habarlady.
Italıada olar baspaldaqtan tóńkerilip túsken adammen birge eń qıyn trúkti 36,66 sekýndta oryndaǵan. Bul jetistik kórermenderdi ǵana emes, halyqaralyq qazylar alqasyn da tańǵaldyrdy. Ol almatylyq akrobattardyń erekshe daıarlyǵynyń, eptiligi men sheberliginiń sımvolyna aınaldy.
«Bul keremet sát boldy. Biz bul rekordqa uzaq jáne tabandylyqpen daıyndaldyq. Búkil zaldyń qol shapalaqtaǵanyn kórý – umytylmaıtyn erekshe sát boldy!», — dedi, rekordsmen, ataqty «SERBAT» akrobatıkalyq tobynyń múshesi Batyr Januzaq.
«Biz úshin bul jaı ǵana rekord emes, bul búkil komandamyzdyń eńbegine, sırk ónerine degen mahabbatyna berilgen baǵa. Bizge sengen barlyq jankúıerlerge alǵysymyz sheksiz!», — dep tolyqtyrdy Almaty sırkiniń rekordsmeni Marlen Maratov.
«SERBAT» sırk toby uzaq ýaqyt boıy álemdik sahnada tanylyp, «America's Got Talent», «Britain's Got Talent» jáne «China’s Got Talent» sıaqty belgili shoýlardyń fınalısteri men jeńimpazdary boldy.
Olardyń qoıylymy árqashan biregeıligimen, sheberligimen jáne joǵary tehnıkalyq deńgeıimen erekshelendi.
«Biz ónerpazdarymyzben maqtanamyz. Bul rekord – jeke jetistik qana emes, sonymen qatar qazaq sırk óneriniń damýyna qosylǵan zor úles. Endi Qazaqstanda naǵyz sırk sheberleri bar ekenin búkil álem biledi», — dedi Qazaq memlekettik sırkiniń dırektory Maqsat Jaıyqov.
Onyń aıtýynsha, bul rekord qazaqstandyq ártisterdiń deńgeıi joǵary ekenin dáleldep, Almaty sırkiniń halyqaralyq arenadaǵy bedelin nyǵaıtýǵa jasalǵan taǵy bir qadam boldy.