Almaty qalasynda 2025 Jańa jyl qalaı toılanady?
Almaty qalasy «Almatynyń 8 keremeti: búkil otbasyǵa arnalǵan sıqyr» atty aýqymdy jańajyldyq baǵdarlamaǵa qyzý daıyndyq ústinde. 20 jeltoqsanda bastalatyn bul merekelik sharalarǵa qalanyń segiz aýdanynyń turǵyndary men qonaqtary qatysyp, merekeniń mánin birge ashady, dep habarlaıdy aqshamnews.kz
Jańa jyl qarsańynda Almaty qalasy ásem bezendiriledi. Basty kireberis – áýejaıdan bastap, ortalyq alańdarǵa deıin qalanyń ár buryshy merekelik keıipke enedi. Qalada 300-ge jýyq jaryq ınstallásıalary, ertegiler keıipkerleri men merekelik sımvoldar ornatylady. Onyń ishinde 120-sy – ótken jylǵy jóndeýden ótken shaǵyn sáýlettik formalar (SHAF). Magıstral boıyndaǵy aǵashtar jaryqdıodty shamdar men gırlándalarmen kómkeriledi. Barlyǵy 1500 jaryq elementi, onyń ishinde 350 qalpyna keltirilgen kronshteınder Almatynyń basty kósheleri men dańǵyldaryn kórkemdeıdi.
Qalanyń 21 mańyzdy ǵımaraty arhıtektýralyq jaryqtandyrýmen aıshyqtalady. Almatynyń sımvolyna aınalǵan «Kóktóbe» telemunarasy da jańajyldyq ásem beınemen bezendirilip, turǵyndar men týrıserge erekshe mýltımedıalyq kórinis usynady.
Bıyl Almatyda alǵash ret negizgi alańdarǵa sabaqtyq klasıkalyq shyrshalar ornatylady. Basty jańajyldyq shyrsha, bıiktigi 22 metr, dástúr boıynsha Respýblıka saraıy aldyndaǵy Abaı alańynda ornatylady. Shyrshany bezendirýge 6 shaqyrym gırlándalar, iri áshekeıler men ekologıalyq taza materıaldardan jasalǵan oıynshyqtar qoldanylady.
Jalpy qalada 80-nen asa shyrsha ornatylady. Ár shyrshany áshekeıleýge 4-6 shaqyrym gırlánda paıdalanylady. Shyrshalar negizgi oryndarda: Tuńǵysh Prezıdent saıabaǵynda, Respýblıka alańynda, «Halyq Arena» muz saraıynda, «Almaty Arena» kesheninde, Abylaı han atyndaǵy teatr aldynda jáne Naýryzbaı aýdanynyń amfıteatrynda, sondaı-aq sırk, saýda ortalyqtary men saıabaqtarda paıda bolady.
20 jeltoqsanda saǵat 19:00-de Respýblıka saraıy aldynda Almatynyń bas shyrshasy saltanatty túrde jaryqtandyrylady. Shara barysynda Turar, Dakelot, Adill, Madı Rymbaev, Dınaıa, Astro toby, Malika Yes, Baljan Bıdash, ALPHA toby sıaqty estrada juldyzdary óner kórsetedi. Aıaz Ata men Aqshaqar da merekeniń basty qonaqtary bolady.
Astana alańynda 22 metrlik shyrsha ornatylady, sondaı-aq Aıaz Atanyń ulttyq naqyshta bezendirilgen ǵajaıyp úıshigi ashylady. Barlyq qala turǵyndary osy úıshikke kirip, merekelik kóńil-kúıge bólene alady.
Ál-Farabı dańǵylyndaǵy «Nurly Taý» bıznes-ortalyǵynyń aldynda 20 jeltoqsanda merekelik jármeńke ashylyp, 26-31 jeltoqsan aralyǵynda live-band toptary óner kórsetedi.
Almatylyq Arbat Karnabı-strıt stılinde bezendirilip, juldyzdar men sharlar kompozısıalary ornatylady. Arbatta 20-31 jeltoqsan aralyǵynda shyrsha jármeńkesi ótedi. Jergilikti sýretshilerdiń kórmesi, otbasylyq oıyndar men mýzykanttardyń qoıylymdary uıymdastyrylady.
Memlekettik qýyrshaq teatry 20-30 jeltoqsan aralyǵynda «Sıqyrly aına» baǵdarlamasy men Gans Hrıstıan Andersenniń «Qar hanshaıymy» spektaklin usynady.
Almatylyq sırk 21 jeltoqsannan 21 qańtarǵa deıin lazerlik shoý men «Qar hanshaıymy» qoıylymyn usynady. Baǵdarlama aıasynda Máskeýdiń Nıkýlın sırki men Ispanıanyń áıgili kloýny óner kórsetedi.
Barlyq 8 aýdanda Aıaz Ata men ertegi keıipkerleriniń sherýi, kórmeler, konsertter jáne oıyn-saýyq baǵdarlamalary uıymdastyrylady. Almaty qalasyn jańajyldyq bezendirýge 800 mıllıon teńge bólindi. Ótken jylǵy dekorasıalardy qalpyna keltirip, jańa sharalarǵa mádenıet mekemelerin tartý arqyly bıylǵy mereke ótken jylǵa qaraǵanda aýqymdy ári sándi bolady.
Almaty qalasynda jańa 2025 jylǵa oraı uıymdastyrylatyn jalpyqalalyq is-sharalar josparymen tómendegi silteme arqyly tanysa alasyzdar.
Jańa jyl Almatyda erekshe kóńil-kúı syılap, barsha qala turǵyndary men qonaqtaryn qýantpaq!