Úkimette 2024 jylǵy qańtar-qarashadaǵy áleýmettik-ekonomıkalyq damý qorytyndysy qaraldy: JİÓ-niń 4,4% ósimi shıkizattyq emes sektor esebinen qamtamasyz etildi
QR Premer-mınıstriniń tóraǵalyǵymen ótken Úkimet otyrysynda 2024 jylǵy qańtar-qarashadaǵy áleýmettik-ekonomıkalyq damý qorytyndysy men respýblıkalyq búdjettiń atqarylý barysy qaraldy.
Premer-mınıstr búginde el ekonomıkasy ósý jolynda ekenin atap ótti.
«Men búgin Memleket basshysyna elimizdegi aǵymdaǵy ekonomıkalyq jaǵdaı týraly baıandadym. Bıylǵy 11 aıdyń qorytyndysy boıynsha JİÓ ósimi 4,4% qurady. Ózderińiz biletindeı, munaı sektorynda turaqsyzdyq saqtalýda. Bıyl 2 mln tonna munaı kem óndirildi. Soǵan qaramastan otandyq ekonomıka shıkizattyq emes sektordyń esebinen ósip keledi. Bul ekonomıkany ártaraptandyrýdyń arta túskenin bildiredi. Prezıdent ekonomıkany odan ári damytý jóninde tıisti tapsyrmalar berdi», — dep atap ótti Oljas Bektenov.
Ekonomıkalyq belsendilikti yntalandyrý boıynsha qabyldanyp jatqan sharalar birshama nátıje bergeni atap ótildi. Máselen, aýyl sharýashylyǵy, óńdeý ónerkásibi, qurylys jáne kólik salasyndaǵy ósim jyldyq josparly kórsetkishterden asyp tústi.