Taǵzym
Keshegi «Qańtar oqıǵasy» áli de umytylǵan joq. Umyta almaı júrgenderdiń biri, qoǵam belsendisi – Gúlzat Asanqyzy. Ol áleýmettik jaǵdaıy tómen, kóp balaly otbasylarmen jumys isteıdi, sol toptyń muńyn muńdap, joǵyn joqtap júretin jan.
Pandemıa kezinde Alataý aýdanyndaǵy «Shańyraq» yqshamaýdanynda jumyssyz, tabyssyz, as-sýsyz qalǵan talaı otbasyna qaıyrymdy jandardan jınalǵan azyq-túlik paketterin jaıaý-jalpylap tasyǵandardyń biri. Qalyń buqaraǵa osylaı jaqyn júretin, aıtar oıy, pikiri bar, qorshaǵan ortasyna beı-jaı qaraı almaıtyn sanasy sergek jan bolǵandyqtan, telebaǵdarlamalar Gúlzatty táýelsiz sarapshy retinde jıi shaqyrady.
Iá, ol «Qańtar oqıǵasyn» kózimen kórgenderdiń biri. Kórmeıin dese, burynǵy jumys orny – «Baqytty otbasy» ortalyǵy da, úıi de dál «Almaty Arenanyń» túbinde boldy. Balasyn qushaqtap tereze aldynda turǵan sol kúni. Bir kezde kóshege shyqqan adamdardyń qarasy qalyńdap bara jatqanyna alańdap, shydamaı syrtqa shyqty. Bir-eki er adam kóshede turǵan kólikterdiń dóńgelegin sheship alyp jatyr eken. «Bularyńyz ne, bireýdiń múlkinde nelerińiz bar, doǵaryńyzdar!» – dep edi, «Sharýańyz bolmasyn, úıińizge baryńyz», – dedi túsi sýyq bujyr qara. Gúlzattyń júregi zyrq ete qaldy. Álgi adamnyń janarynda óshpendilik bar sıaqty kórindi. Biraq onyń jan-jaǵyn nege qıratyp júrgenin túsine almaı dal. Aınala ý-shýǵa tolyp ketti. Gúlzat júregine óksik tyǵylyp, úıine áreń jetti. Bir qarasa, aǵyl-tegil jylap otyr eken. Nege jylap otyrǵanyn ózi de bilmeıdi. Bir bileri – Almatyǵa nıeti buzyq adamdar qastandyq jasap jatqandaı, alyp megapolıs shaıqatylyp turǵandaı áserden aryla almady. Olardyń beıbit nıette sherýge shyqqan otandastarymyzdyń arasyna iritki salmaq bolǵan lańkester ekenin keıin bildi ǵoı.
Árıne, bginde ol kúnder de artta qaldy. Biraq umytý múmkin emes. Almatyda Respýblıka alańynda «Qańtar oqıǵasynyń» qurbandaryna arnalǵan «Taǵzym» kóp satyly sáýlet kesheni ashyldy degende, erteńine arnaıy baryp kórgeni de sondyqtan. Kóńili bir ysyp, bir sýyǵanyn da jasyrmaıdy. Sol kúnder kóz aldynan taǵy bir óte shyqqandaı bolǵan sebebi. Qazir búkil arman-maqsatyn júzege asyrýǵa dáneker bolǵan arý Almaty burynǵysynan da kórkeıip, kóz aldynda bıiktep keledi. Soǵan qýanady.
Taqyrypqa oraı
Gúlzat ASANQYZY, qoǵam belsendisi: Tasqa qashalǵan tarıh
«Taǵzym» memorıalynyń avtorlaryna rahmet, sátti sheshimderge barǵan. Ondaǵy eskertkish tastar tórt bólikke bólingen. Máselen, aqshyl sur bóligi – eńserýdi, qara tús «Qańtar oqıǵasy» kezindegi ózim kýási bolǵan dúrbeleń men úreıdi beıneleıdi. Sur bóligi qurban bolǵan jazyqsyz jandar men tógilgen qannyń sımvoly bolsa, aq tús bolashaqqa, jaqsy kúnderge umtylýdy bildiredi. Ár tasqa qashalyp jazylǵan uly tulǵalarymyzdyń qanatty sózderin túgel oqyp shyqtym. Onyń bári - búgingi urpaqqa ónege. Tasqa qashalǵan «Qańtar oqıǵasy» eshqashan qaıtalanbaýy kerek. Elimizdiń amandyǵyn, jerimizdiń tutastyǵyn qorǵaý – úlkenniń de, kishiniń de perzenttik paryzy dep bilemin.