Sýrdologıalyq kómekke 1 282 adam muqtaj
Almatyda estý qabileti buzylǵan turǵyndarǵa sýrdologıalyq kómek kórsetý aıasy keńeıdi. Bul týraly Jumyspen qamtý jáne áleýmettik baǵdarlamalar basqarmasy teń múmkindikter bóliminiń basshysy Amanat Sultanǵazıev málim etti, dep habarlaıdy Almaty-akshamy.kz QazAqparatqa silteme jasap.
Spıkerdiń aıtýynsha, Qazaqstandaǵy alǵashqy «Ten Qogam» ortalyǵy Almatyda 2020 jyldyń mamyr aıynda ashyldy. Jyl basynan beri ortalyqta múgedektigi bar 1 768 adamǵa qyzmet kórsetildi.
Al, bıyl megapolıste taǵy bir ortalyq ashý týraly sheshim qabyldandy.
«Ortalyq estý qabileti buzylǵan adamdarǵa arnalǵan. Ol sýrdotehnıkalyq quraldarmen qamtamasyz etilgen. Munda eresekter de, balalar da kómek ala alady. Jyl basynan beri múgedektigi bar 23 myń almatylyq tehnıkalyq ońaltý quraldarymen jáne áleýmettik qyzmettermen qamtamasyz etildi. Jeke ońaltý baǵdarlamasyn 85%-ǵa deıin oryndaý josparlanyp otyr», - dedi Amanat Sultanǵazıev óńirlik komýnıkasıalar qyzmetiniń alańynda ótken brıfıńide.
Aıtýynsha, sýrdologıalyq kómekke muqtaj 1 282 adamnyń 970-i qamtamasyz etilgen. Ymdaý tili mamanynyń qyzmetterin estý qabileti buzylǵan 760 adam paıdalanady.