25 jastaǵy azamat birneshe alaıaqtyqqa qatysy bar dep kúdiktelýde.
Birqatar alaıaqtyq jasady degen kúdikpen Almaty oblysynyń týmasy ustaldy. Jas jigit qalanyń keminde jeti turǵynyn aldady degen kúdikke ilindi. Jábirlenýshilerdiń nusqasy boıynsha, kúdikti júrgizýshi kýáligin alýǵa kómektesemin degen jeleýmen aldyn ala tólem alyp, jasyrynyp qalǵan, dep habarlaıdy Almaty-akshamy.kz Polisia.kz-ke silteme jasap.
«Jedel sharalar júrgizilip, kúdikti qamaýǵa alyndy. İsti qaraý barysynda onyń osyǵan uqsas jeti epızodqa qatysy bar bolýy múmkin ekendigi anyqtaldy. 25 jastaǵy A.esimdi azamatqa qatysty QR QK-niń 190-baby 3-bóligi (Alaıaqtyq) boıynsha qylmystyq is tirkeldi», – dedi Alataý aýdandyq polısıa basqarmasynyń bastyǵy Talǵat Berkinbaev.
Biraq polısıa zardap shekkenderdiń kóp bolýy múmkin ekendigine senimdi. Qazir tergeýshiler ustalǵan azamattyń buryn jasalǵan osyǵan uqsas qylmysqa qatysy bar-joǵyn tekserip jatyr. QR QPK-niń 201-babyna sáıkes tergeý múddesin kózdeıtin ózge de málimetter jarıa etýge jatpaıdy.