Túrkıada alapat jer silkinisi bolǵan Gazıantep oblysynyń Nurdaǵy aýdanynda jańa úılerdiń alǵashqy legi berildi.
14 úıdiń kiltin turǵyndarǵa alǵashqy bolyp Prezıdent Rejep Taıyp Erdoǵan tabystady. Baspana 4 bólmeli jáne ystyq, sýyq sý men dárethanasy ishinde. 40 myńnan asa turǵyny bar Nurdaǵy jer silkinisinen eń qatty zardap shekken aýdandardyń biri, dep habarlaıdy Almaty-akshamy.kz Qazaqstan.tv veb-saıtyna silteme jasap.
Ǵımarattardyń 90 paıyzdan astamy qıraǵan bolatyn. Zilzaladan 44 kún ótkende qurylysy aıaqtalǵan bul úılerden bólek, qazir apat bolǵan 11 oblysta 650 myń úıdiń qurylysy júrip jatyr. Jyl sońyna deıin 320 myńǵa tarta baspana apattan zardap shekkenderge tabystalady.
«Búgin sizderge tek turǵyn úı ǵana emes, qora-qopsysy, meshiti, saıabaǵy bar, jańa tehnologıamen jabdyqtalǵan «aqyldy aýyl» salyp berip otyrmyz. Budan bólek, mal sharýashylyǵymen, baý-baqsha egýmen aınalysamyn degen turǵyndarǵa paıyzsyz nesıe beremiz. Sondaı-aq, basqa óńirlerden osy jaqqa kóship kelip, aýyl sharýashylyǵymen aınalysamyn degen jastar bolsa, úı alýǵa memleketten qarjylaı kómek bermekshimiz», - dedi Túrkıa Prezıdenti Rejep Taıyp Erdoǵan.