2022 jyldyń 7 aıynda MÁMS paketi arqyly kórsetilgen qyzmetter úshin 78 mlrd teńgege jýyq qarjy tólendi.
Bul týraly búgingi brıfıńte «Áleýmettik medısınalyq saqtandyrý qory» KEAQ Almaty qalalyq fılıaly dırektory Tileýhan Ábildaev aıtty, dep habarlaıdy Almaty-akshamy.kz
Aıtýynsha, qańtar-shilde aralyǵynda tólengen qarjynyń basym bóligi – 40,6 mlrd teńgesi stasıonarlyq deńgeıdegi medısınalyq kómekke, taǵy 3,2 mlrd teńgesi kúndizgi stasıonar qyzmetine jumsalǵan.
«7 aıdyń nátıjesine qarap, halyqqa kórsetilip jatqan medısınalyq kómek kóleminiń edáýir artqanyn baıqaýǵa bolady. Máselen, buǵan deıin kópshiliktiń qaltasy kótere bermeıtin qymbat analızder, dıagnostıka men operasıa túrleri qazir medısınalyq saqtandyrý esebinen kórsetilip jatyr», – dedi Tileýhan Ábildaev.
Tólengen qarjynyń 15,9 mlrd teńgesi konsýltatıvtik-dıagnostıkalyq qyzmetterge tıesili. Konsýltatıvtik-dıagnostıkalyq qyzmetter ishinde ásirese, KT men MRT-ǵa degen suranys joǵary. Jeti aıda Almaty qalasynda 996,8 mln teńgege 62 myńnan astam kompúterlik tomografıa, 744,2 mln teńgege 50 myńnan astam magnıttik-rezonanstyq tomografıa jasalǵan. Sonymen qatar, qala boıynsha onkologıalyq isikti anyqtaý maqsatynda jasalatyn 2793 PET-dıagnostıka qyzmeti kórsetilgen. Oǵan 750,1 mln teńge tólendi.
«Sońǵy jyldary ekstrakorporaldy uryqtandyrý qyzmetiniń de jurtshylyq úshin mańyzy joǵary bolyp otyrǵany ras. Qymbat qyzmet túrine jatatyn EKO prosedýrasy 2020 jyldan bastap MÁMS paketine enip, qarapaıym jurtshylyq úshin qoljetimdi bola bastady. 2022 jyly EKO baǵdarlamalaryna 3,2 mlrd teńgeden astam qarjy qarastyrylǵan. Buǵan barlyǵy 3152 EKO jasalýy tıis. Ótken 7 aıda Almatyda 1639 EKO jasalyp, oǵan 1,7 mlrd teńge tólendi. Bıyl ońtústik astana boıynsha atalǵan baǵdarlamaǵa 8 klınıka qatysyp jatyr», - dep qosty fılıal basshysy.
Aıtýynsha, qazirgi tańda saqtandyrylǵan azamattar baǵasy qymbat qyzmet túrlerin qarqyndy paıdalanyp júr. Sonyń biri – medısınalyq reabılıtasıa. 2022 jyly kórsetilgen reabılıtasıa qyzmetine 4,7 mlrd jumsaldy. Salystyrar bolsaq, 2019 jyly ońaltý qyzmetine bar-joǵy 0,6 mlrd teńge jumsalǵan, al 2022 jyly oǵan 7,5 mlrd teńge qarastyrylyp otyr.
«Oǵan qosa, 2020 jyldan bastap halyqtyń jekelegen sanattary úshin josparly stomatologıalyq kómek te qoljetimdi bola bastady. Mysaly, 7 aıda MÁMS sheńberinde 717 myńnan astam stomatologıalyq qyzmet kórsetilgen, oǵan 1,8 mlrd teńge tólendi. Qazirgi tańda Almatyda MÁMS sheńberindegi stomatologıalyq kómekti 46 klınıka kórsetedi», - dedi Tileýhan Ábildaev.
Esterińizge sala ketsek, mindetti áleýmettik medısınalyq saqtandyrý arqyly júkti áıelder men 18 jasqa deıingi balalarǵa stomatologıalyq kómek tegin kórsetiledi. Olardyń arasynda tisti jansyzdandyrý, hımıalyq plomba salý, terapevtiń qabyldaýy, pýlpıt pen perıdontıtti emdeý, flúoroz, gıpoplazıa kezinde tistiń anatomıalyq pishinin tolyq qalpyna keltirý, tisti hırýrgıalyq jolmen julý, t.b. qyzmetter kiredi. Al, shuǵyl stomatologıalyq kómek kepildendirilgen tegin medısınalyq kómek paketi sheńberinde halyqtyń áleýmettik jaǵynan az qorǵalǵan sanattaryna ǵana kórsetiledi.