2022 jyldyń 7 aıynda almatylyqtar ambýlatorıa deńgeıinde 13,3 mlrd teńgeniń dári-dármegimen qamtamasyz etilgen.
Bul týraly búgin brıfıńte Medısınalyq saqtandyrý qory Almaty fılıalynyń dırektory Tileýhan Ábildaev habarlady. Aıtýynsha, saqtandyrý engizilgeli beri Almaty turǵyndary medısınalyq qyzmetterdi belsendi paıdalanyp keledi, dep habarlaıdy Almaty-akshamy.kz.
Sonyń ishinde medısınalyq qyzmet kólemi ǵana emes, syrqat túrlerine qaraı beriletin dári-dármek sany da birneshe ese artqan.
Búginde turǵyndar belgili bir syrqattar boıynsha tegin medısınalyq kómek jáne saqtandyrý paketteri sheńberinde tegin dári-dármek ala alady. Onyń ishinde áleýmettik mańyzy bar, sozylmaly jáne jedel aýrýlar, koronavırýs ınfeksıasyna shaldyqqandarǵa beriletin dáriler de bar.
«Ótken 7 aıda Almaty qalasy boıynsha tegin medısınalyq kómek paketi boıynsha 149 myńnan astam pasıent dári-dármekpen qamtamasyz etilgen. MÁMS paketi boıynsha195 myńnan astam eresek, 19 myńǵa jýyq bala tegin dári-dármek aldy», - dedi fılıal basshysy.
Tegin dári-dármek kimderge beriledi?
Tegin medısınalyq kómek paketinde:
Dıspanserlik esepte turǵan Qazaqstan azamattary, yqtıarhaty bar shetel azamattary 50 túrli dert boıynsha dári-dármekpen qamtamasyz etiledi.
MÁMS paketinde:
Belgili bir syrqatyna baılanysty dıspanserlik esepte turǵan, saqtandyrylǵan azamattar qamtamasyz etiledi. Saqtandyrý paketi arqyly eresekterge 50 nozologıa, balalarǵa 73 nozologıa boıynsha dári tegin beriledi.
Dári-dármek 18 jasqa tolmaǵan balalarǵa dáriger tarapynan dıagnozy naqtylanǵannan keıin beriledi.
Tegin dári alý úshin ne isteý qajet?
• Aldymen emhanaǵa tirkelý kerek
• Dıspanserlik baqylaýǵa alynatyn syrqaty bolsa, tıisti esepke turý qajet
• Ýchaskelik dáriger/terapevt nemese emdep jatqan salalyq mamannan dári-dármekke resept alady.
Tegin medısınalyq kómek jáne MÁMS paketi arqyly beriletin dárilik zattardyń naqty tizimimen myna silteme arqyly tanysýǵa bolady: https://adilet.zan.kz/rus/docs/V2100023885#z47