Mamandar qoǵamdyq eskertý júıesiniń daıyndyǵyn josparly tehnıkalyq tekserýden ótkizedi.
Qyrkúıek 29 kúni almatylyq qutqarýshylar dabyl belgisin iske qosyp, tekserý jumysyn júrgizedi, dep habarlaıdy Almaty-akshamy.kz QazAqparatqa silteme jasap.
«29 qyrkúıek saǵat 12.55-te Almaty qalasy tótenshe jaǵdaılar departamenti qoǵamdyq eskertý júıesiniń daıyndyǵyn josparly tehnıkalyq tekserýden ótkizedi. Jattyǵý kezinde «Nazar aýdaryńyzdar!» habarlamasymen birge elektrondy dabyl iske qosylady. Oǵan qosa, teleradıoarna jumysy avtomatty túrde toqtatylyp, dabyl habarlamasy taratylady», - dep atap ótti departamentten.
Vedomstvo Almaty qalasynyń turǵyndary men qonaqtarynan sabyr saqtaýdy suraıdy.
«Búkil eresek adamdar ózderi úreıge berilmeı, balalarǵa sırenanyń dybysy «Barshanyń nazaryna!» dabyly ekendigin túsindirý qajet. Podezd jáne turǵylyqty jeri boıynsha kórshilerge habarlańyzdar, óıtkeni olar berilgen aqparatty estimegen bolýy múmkin. Kez kelgen dúrbeleń men qaýesetti dereý toqtatyńyz»,- delingen habarlamada.
Eger dabyl kezinde siz úıde bolsańyz, onda:
- radıoqabyldaǵyshty nemese teledıdardy qosyńyz;
- tótenshe jaǵdaı týraly habarlamany tyńdańyz;
- berilgen habarlamaǵa sáıkes áreket etińiz.
- Eger dabyl kezinde kóshede bolsańyz, onda:
- kóshedegi daýys zoraıtqyshtarmen jáne mobıldi eskertý qurylǵylarymen jiberilgen tótenshe jaǵdaı týraly habarlamaǵa qulaq asyńyz;
- berilgen habarlamaǵa sáıkes áreket etińiz.