Bul týraly Almaty qalasy ákimi orynbasary A. Qyryqbaev málimdedi, dep habarlaıdy Almaty-akshamy.kz
Almaty Ortalyq Azıa óńirinde sportty damytý boıynsha tanymal kóshbasshy bolyp tabylady. Qalada Azıa oıyndary, Dúnıejúzilik ýnıversıada, álem chempıonattary, Álem kýbogynyń kezeńderi jáne t.b. sıaqty iri sporttyq is-sharalardy ótkizý tájirıbesi bar.
Qalada ártúrli menshik nysanyndaǵy 3 611 sport obektileri jumys isteıdi. Sporttyń 78 túri maqsatty túrde damýda. Dene shynyqtyrýmen jáne sportpen turaqty túrde (aptasyna keminde 1 ret) aınalysatyn qala turǵyndarynyń sany 34% - dy nemese 660 myń adamdy quraıdy.
Qala dástúrli túrde elimizdiń jalpy komandalyq birinshiliginde kósh bastap keledi, qala sportshylary Qazaqstannyń olımpıadalyq quramasy músheleriniń 30% - yn quraıdy.
Sonymen qatar, salada birqatar problemalyq máseleler bar.
Birinshi. Obektilerdiń tapshylyǵy. Tabıǵı ósim men ishki kóshi-qon prosesteriniń esebinen qala halqy jyl saıyn artyp keledi. Búgingi tańda qalada jalpy aýdany 81 500 m2 bolatyn jabyq sport nysandary bolsa, 65 000 m2 tapshylyq saqtalýda;
Ekinshi. Mádenıet obektilerindegideı sporttyq ınfraqurylymdy bólýde tepe-teńsizdik bar. Mysaly, Alataý, Jetisý, Naýryzbaı jáne Túrksib aýdandarynda qala halqynyń 45% - y turady. Bul rette olarda fýtbol alańdarynyń tek 30%-y, baseınderdiń 20% - y, fıtnes-zaldardyń 22%-y ǵana bar.
Úshinshi. Jasalǵan jaǵdaılarǵa, eldegi úzdik ınfraqurylymǵa, bilikti jattyqtyrýshylardyń, nusqaýshylardyń jetkiliktiligine qaramastan, statısıka derekteri boıynsha dene shynyqtyrýmen turaqty aınalyspaıtyn almatylyqtardyń úlesi 70% - ǵa deıin quraıdy.
Osy problemalardy sheshý maqsatynda Madrıd, Boston, Lıssabon, Vena, Súrıh, Valensıa sıaqty qalalardyń halyqaralyq tájirıbesi zertteldi, olar sporttyq ınfraqurylymmen qamtamasyz etý boıynsha, qala turǵyndarynyń dene shynyqtyrý men sportqa degen qyzyǵýshylyq deńgeıi boıynsha da, ıaǵnı halyqty salaýatty ómir saltyna sanaly túrde tartý boıynsha da kóshbasshy bolyp tabylady.
Taldaý kórsetkendeı, sportty damytý halyqty saýyqtyrý men áleýmettendirýdiń ǵana emes, jalpy ekonomıkalyq damýdyń qosymsha faktory bolyp tabylady.