Onyń eki birdeı epızodqa qatysy bar ekendigi anyqtaldy
Ol azamattardy júrgizýshi kýáligin alýǵa kómektesemin dep aldaǵan, dep habarlaıdy Almaty-akshamy.kz Polisia.kz-ke silteme jasap.
Naýryzbaı aýdandyq polısıasynyń málimetinshe, 25 jastaǵy A. esimdi azamatshaǵa qatysty QR QK-niń 190-baby 3-bóliginiń 4-tarmaǵy boıynsha qylmystyq is qozǵalýda. Jas qyz shahardyń keminde eki turǵynyn aldady degen kúdikke ilindi.
«Jergilikti turǵyn onyń zańsyz áreketi týraly habarlady. Onyń aıtýynsha, boıjetken ózin Mamandandyrylǵan halyqqa qyzmet kórsetý ortalyǵynyń qyzmetkerimin dep tanystyryp, júrgizýshi kýáligin tez arada alýǵa kómektesýdi usynǵan. Jedel sharalar qoldanylyp, kúdikti ustaldy. İsti qaraý barysynda onyń eki birdeı epızodqa qatysy bar ekendigi anyqtaldy. Boıjetken óz qyzmeti úshin 20 myńnan 50 myń teńgege deıin aldyn ala tólem suraǵan», – deıdi Naýryzbaı aýdandyq polısıa basqarmasynyń bastyǵy Dıdar Ahanov.
Biraq polısıa jábirlenýshilerdiń kóp bolýy múmkin ekendigine senimdi. Tártip saqshylary osy qyzdyń áreketinen zardap shekkenderdiń barlyǵyn myna telefondar arqyly habarlasýǵa shaqyrady: 8-707-447-07-50; 8-747-699-70-02 jáne 8-778-622-02-19.