Aıyppuldyń jalpy somasy 12 mıllıon teńgeden asty.
Fly Arystan reısterin keshiktirgeni úshin Air Astana kompanıalar tobyna taǵy da aıyppul salyndy, dep habarlaıdy Almaty-akshamy.kz Azamattyq avıasıa komıtetine silteme jasap.
Qazaqstannyń ındýstrıa jáne ınfraqurylymdyq damý mınıstri Qaıyrbek Óskenbaevtyń tapsyrmasy boıynsha Komıtet reısterdiń keshigýi kezinde jolaýshylardyń quqyqtaryn buzǵany úshin áýe tasymaldaýshylardy jaýapkershilikke tartýdy jalǵastyryp jatyr.
Azamattyq avıasıa komıteti tergeý barysynda anyqtaǵandaı, 2022 jyldyń 16 shildesinde Air Astana kompanıalar tobyna kiretin Fly Arystan bólimshesiniń Almaty – Atyraý baǵytyndaǵy KS-7202 reısi 12 saǵat 9 mınýtqa keshikken. Osy reıstiń jolaýshylary ushýdy kútý kezinde olarǵa Qazaqstannyń áýe keńistigin paıdalaný jáne avıasıa qyzmeti týraly zańnamada kózdelgen qyzmetter tıisti túrde usynylmaǵan. Jolaýshylarǵa turaqtaý úshin qonaq úı qarastyrylmaǵan.
«Air Astana áýe kompanıasy toby reıs keshigýi kezinde jolaýshylardyń quqyqtaryn buzǵany úshin sońǵy bir aıda tórtinshi ret ákimshilik jaýapkershilikke tartylyp, jalpy somasy 12 mıllıon teńgeden asatyn aıyppul arqalady», - dedi Azamattyq avıasıa komıtetiniń tóraǵasy Talǵat Lastaev.
Onyń aıtýynsha, Komıtet zańnamada kózdelgen mindettemelerdi oryndamaǵan jaǵdaıda áýe tasymaldaýshylaryn ákimshilik jaýapkershilikke tartý úshin qajetti sharalardy qabyldap jatyr.