Mádenıet jáne sport mınıstri Dáýren Abaev josparlaýdan bastap eskertkishterdi ornatqanǵa deıingi jumysqa muqıat qaraý óte mańyzdy ekenin aıtty.
Almaty qalasynda Ahmet Baıtursynulyna eskertkish jáne Jumat Shanınge búst ornatylady, dep habarlaıdy Almaty-akshamy.kz OKQ-ne silteme jasap.
Qostanaı oblysynyń Torǵaı aýylynda Ahmet Baıtursynuly men Mirjaqyp Dýlatulyna eskertkish turǵyzylady, sondaı-aq Almaty qalasynda Ahmet Baıtursynulyna eskertkish jáne Jumat Shanınge búst ornatylady. Quramyna belgili músinshiler, sýretshiler, zergerler, ǵalymdar men qoǵam qaıratkerleri kiretin Monýmenttik óner qurylystaryn ornatý jónindegi komısıa respýblıkalyq konkýrstyń qorytyndysy boıynsha jobalaý jumystaryn qarap, maquldady.
«Eskertkishter – tarıhı jadymyzdy jańǵyrtýda jáne qoǵamdyq sanany qalyptastyrýda erekshe mánge ıe. Sondyqtan josparlaýdan bastap eskertkishterdi ornatqanǵa deıingi jumysqa muqıat qaraý óte mańyzdy. Komısıa toby músinderdiń jumsaq materıaldan jasalǵan tolyq kólemdegi nusqasyn jan-jaqty qarastyrýy qajet», – dedi Mádenıet jáne sport mınıstri Dáýren Abaev.
Sondaı-aq, komısıa músheleri Jambyl, Qaraǵandy, Qostanaı, Túrkistan jáne Ulytaý oblystary ákimdikteriniń ıdeıalyq usynystaryn biraýyzdan qoldady. Atalǵan óńirlerde Qazaqstannyń Halyq jazýshysy Sherhan Murtazaǵa, aqyn, memleket jáne qoǵam qaıratkeri Kákimbek Salyqovqa, Nıaz batyr Saıdaly Barqyulyna, İİ Dúnıejúzilik soǵys jáne eńbek ardageri Jaqsybek Ońshybaevqa jáne túrik saıasatkeri, memleket qaıratkeri Adnan Menderske arnalǵan eskertkishterdi jobalaý josparlanǵan.
Komısıa músheleri Sartaı Baıjanulyna arnalǵan «Sartaı batyr – myń bala» eskertkishiniń jobalyq jumysyn qabyldamady, joba qaıta pysyqtaýdy qajet etedi. Sondaı-aq, jıynda sarapshylar monýmentaldy óner salasyndaǵy ózekti máselelerdi de talqylady.