Qazir qalamyzda Anti Fraud respýblıkalyq is-sharasy ótip jatyr.
Almatyda páter alaıaqtary qymbat emes jyljymaıtyn múlikti jalǵa beremiz degen jeleýmen azamattardy aldaǵan, dep habarlaıdy Almaty-akshamy.kz Polisia.kz-ke silteme jasap.
Aldanǵandardyń arasynda qalada páter jaldap turýdy josparlaǵan 28 jastaǵy arý da bar. Ol habarlandyrýlar saıtynan qolaıly baspanany tapqan.
«Aýyzsha kelisimge sáıkes, áıel ózine unaǵan páter úshin aldyn ala tólem berýi kerek edi. Ol jarnama avtorynyń kartochkalyq shotyna 100 myń teńge jibergen. Alaıaqtardyń qurbany bolǵanyn bilgen boıda áıel adam Almaly aýdandyq PB-na qarasty polısıa bólimine aryzdanǵan. Alǵashqy bolyp 24 jastaǵy J. esimdi azamat ustaldy. Onyń “mindetine” habarlandyrýlardy ornalastyrý jáne “áleýetti klıenttermen” hat almasý kirgen. Qylmystyń taǵy bir sybaılasy – qylmystyq ıdeıanyń avtory, 28 jastaǵy J. esimdi azamat. Ol qarajatty qolma-qol aqshaǵa aınaldyrýǵa jaýapty bolǵan. Bul kúdikti de ustaldy. Qazirgi ýaqytta bank shottary boıynsha júrgizilgen tranzaksıalarǵa taldaý júrgizilip, kúdiktilerdiń basqa da qylmystyq quqyq buzýshylyq epızodtaryna qatystylyǵy anyqtalyp jatyr», – dedi Almaty qalalyq PD krımınaldyq polısıa basqarmasynyń bastyǵy Qýatbek Naýatov.
Eske sala keteıik, osy kúnderi Almatyda aqparattyq tehnologıalardy qoldaný arqyly jasalǵan quqyq buzýshylyqpen kúresý sharalarynyń tıimdiligin arttyrýǵa baǵyttalǵan Anti Fraud respýblıkalyq is-sharasy ótip jatyr.