Boryshkerlerdiń avtomobılderi "Sergek" kameralarynyń kómegimen anyqtalady.
Almatyda salyq bereshegi bar boryshkerlerdiń kólikteri aıyppul turaǵyna qoıylady, dep habarlaıdy Almaty-akshamy.kz
Bul baǵyttaǵy jumys jalǵasýda.
Sondyqtan shaharda avtokólik quraldary boıynsha salyq bereshegin óndirip alý maqsatynda qalalyq polısıa departamentimen jáne jeke sot oryndaýshylarynyń óńirlik palatasymen birlesip "Boryshker" jedel-aldyn alý is-sharasy ótkizilýde.
Bul týraly qalalyq Memlekettik kirister departamentiniń baspasóz qyzmeti habarlady.
Jeke sot oryndaýshylarynyń qaýlysy bar boryshkerlerdiń avtomobılderi "Sergek" kameralarynyń kómegimen anyqtalady jáne bereshek tolyq ótelgenge deıin aıyppul turaǵyna qoıylady.
"Búgingi tańda kólik quraldaryna salynatyn salyq boıynsha bereshek 4,9 mlrd teńgeni quraıdy. Bereshektiń negizgi bóligi qozǵaltqyshynyń kólemi 4000 tekshe sm-den asatyn avtokólikterge tıesili", – dep habarlady MKD.
Bir apta ishinde jıyrmadan asa kólik, sonyń ishinde Porshe cayenne, Toyota Land Cruiser, Mercedes-Benz jáne t. b. avtolar aıyppul turaǵyna qoıyldy.
Almaty qalasy boıynsha MKD avtokólik ıelerin aıyppul turaǵyna qamaýdy jáne sot oryndaýshylarynyń qyzmetterine aqy tóleý boıynsha jaısyz jaǵdaılardy boldyrmaý úshin jaqyn arada salyq bereshegin óteýge shaqyrady.
Salyq bereshegin MKK "E-Salyq-Azamat" mobıldi qosymshasynyń kómegimen jáne óz betinshe www.kgd.kz ınternet-resýrsta, sondaı-aq ekinshi deńgeıdegi bankterdiń mobıldi qosymshasynda tekserýge bolady.