Bul týraly Almaty qalasynyń Óńirlik komýnıkasıalar qyzmetiniń brıfıńinde Seıilhan Aqylbekov habarlady. Osy aıda onda kókónis qoımasy bar jemshóp blogynyń qurylysy bastalatyny belgili boldy, dep habarlaıdy Almaty-akshamy.kz
Haıýanattar baǵy dırektorynyń habarlaýynsha, bıyl 21 janýardan 33 tól alynǵan.
«Bizde kók qoshqar, ponı, kengýrý, jaıra, mysyq lemýrlary, ala buǵy, qodas, Chapman zebrasy, sýsıyr, qaraqus balapandary, qumaı, japon tyrnasy, taý qazy, afrıkalyq sur jylan jáne t.b. tólderi týdy», - dedi S. Aqylbekov.
Haıýanattar baǵyndaǵylar janýarlardyń aýyrýy múmkin ekenin jasyrmaıdy, bıyl 55 bas janýar aýyrdy, bul jalpy maldyń 1% - dan sál astamy. Tájirıbeli veterınarlar asyraýdaǵy janýarlarǵa kútim jasaıdy jáne emdeıdi.
Salynyp jatqan kókónis qoımasyna keletin bolsaq, ol qosalqy sharýashylyq egistikterinen jáne kúzde arzandatylǵan baǵamen satyp alynǵan kókónister men jemisterdi saqtaýǵa múmkindik beredi, bul haıýanattar baǵynyń mal azyǵyna qarajat únemdeıdi.
Sonymen qatar, «Afrıkalyq savanna» keshenin salý josparlanýda, jobalyq-smetalyq qujattama ázirlenip, onyń qurylysyna konkýrs utyp lyndy. «Afrıkalyq savanna» kesheninde 100-ge jýyq janýardyń 25 túrine deıin kórsetiledi.
«Afrıkalyq savanna» jańa ekspozısıasy paıdalanýǵa berilgennen keıin janýarlardy ustaý sharttary tabıǵı mekendeý ortasyna barynsha jaqyn bolady, onda bir alańda janýarlardyń birneshe túri ustalatyn bolady. Qyzmet kórsetetin qyzmetkerlerdiń eńbek jaǵdaılary, sondaı-aq kelýshilerge qolaıly jaǵdaı jasalyp, olardyń qyzyǵýshylyǵy eskeriletin bolady. Bul ekspozısıa jyl boıy jumys isteıtin bolady, bul kelýshiler sanynyń artýyna áser etedi. Qurylys-montaj jumystaryn 2024 jylǵa josparlap otyrmyz», - dep jalǵastyrdy haıýanattar baǵynyń dırektory.
Sondaı-aq haıýanattar baǵynda jalpy aýmaǵy 1,5 gektar bolatyn «Arktıka» kesheni salynady. Onda tabıǵı ortaǵa barynsha uqsastyrylǵan jaǵdaılar jasalady. Osynyń arqasynda haıýanattar baǵy aq aıýlardyń jas jubyn satyp ala alady.
Sonymen qatar, qar barysy men sileýsinge arnalǵan qorshaý salynady. Jańa qorshaýlar Almaty qalasy men İle Alataýy taýlarynyń sımvoly – qar barysyn kórsetýge múmkindik beredi. Jabaıy janýarlardy barynsha tabıǵı jaǵdaıda ustaý árqashan haıýanattar baǵyna kelýshiler men janýarlar álemine qyzyǵatyndardyń kóńilinen shyǵady, deıdi spıker.
Haıýanattar baǵynyń basshylyǵy 2024 jyly «Tropıkalyq jumaq nemese maımyldar eli», «Madagaskar», «Qazaq dalasy» keshenderiniń qurylys jobasyn jasaýdy josparlap otyr. Sonymen birge, jańa veterınarlyq klınıka salý, jabaıy janýarlardy reıntrodýksıalaý ortalyǵy jobalary jasalmaq. Jospar boıynsha 2030 jylǵa deıin haıýanattar baǵynyń jalpy aýmaǵynyń 70 %-y rekonstrýksıalanady», - dep qorytyndylady Almaty haıýanattar baǵynyń dırektory.