Polısıa atys qarýyn zańsyz saqtaý derekteriniń aldyn alý maqsatynda turǵyndardan tirkelmegen qarý-jaraq, oq-dáriler men jarylǵysh zattardy satyp alý boıynsha is-sharalar júrgizip jatyr, dep habarlaıdy Almaty-akshamy.kz Polisia.kz-ke silteme jasap.
«Turǵyndardan zańsyz saqtalǵan qarýdy satyp alý boıynsha is-sharalar aıasynda aýmaqtyq polısıa bólimshelerine azamattardan 24 ótinish kelip tústi. Azamattar 34 birlik tirkelmegen atys qarýyn, sondaı-aq myltyqqa arnalǵan 60 patrondy óz erkimen tapsyrdy. Tirkelmegen qarý men oq-dárilerdi tapsyrǵan azamattarǵa tólengen aqshalaı tólemderdiń jalpy somasy 2,3 mln teńgeden asady. Sonymen qatar zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrýǵa nıet bildirgen azamattar, eger áreketterinde basqa quqyq buzýshylyqtar bolmasa, qylmystyq jáne ákimshilik jaýapkershilikten bosatylatynyn aıta ketý kerek», – dedi Almaty qalalyq PD ákimshilik polısıa basqarmasynyń bastyǵy Asqat Qulbaev.