QR Qarýly kúshteri Áskerı polısıa organdarynyń qurylýy 1997 jylǵy 22 sáýirde «Qazaqstan Respýblıkasynyń Quqyq qorǵaý organdary júıesin odan ári reformalaý jónindegi sharalar týraly» Prezıdent Jarlyǵyna qol qoıýmen baılanysty.
Qarýly kúshter quqyq qorǵaý qurylymynyń qaǵıdattary, mindetteri men júıesi, quqyqtyq negizderi, «Áskerı polısıa organdary týraly» QR Zańynda bekitilgen. 2023 jylǵy 14 naýryzdaǵy zańnyń jańa redaksıasy onyń ókilettikterin keńeıtti, dep habarlaıdy aqshamnews.kz.
Qorǵanys mınıstrliginiń málimetinshe, Áskerı polısıa organdaryna áskerı qyzmettiń qaýipsizdigin qamtamasyz etýdi uıymdastyrýda vedimistik baqylaý fýnksıasy berildi. Sol sıaqty áskerı polısıa organdarynyń áskerı qyzmetshilerin áleýmettik jáne quqyqtyq qorǵaý jáne kadrlyq qamtamasyz etý máselelerine de tolyqtyrýlar engizildi.
Áskerı polısıa uıymdyq turǵydan Qarýly kúshterdiń quramyna kiredi. Búginde onyń qurylymyna qylmysty azaıtýǵa, quqyq buzýshylyqtyń aldyn alýǵa jáne áskerı qyzmetshilerdiń quqyqtyq deńgeıin arttyrýǵa baǵyttalǵan jańa bólimsheler engizilgen. Áskerı polısıa quramyndaǵy kınologıalyq qyzmet te onyń jumysyna aıtarlyqtaı úles qosyp keledi.
«Ómirińdi saqta» vedomstvoaralyq baǵdarlamasyna sáıkes áskerı polısıanyń áskerı qyzmetshileri quqyqtyq tártip pen ishki tártipti qoldaýǵa, qarý men oq-dárilerdi saqtaýǵa, qaýipsizdik sharalaryn oryndaýǵa jáne JKO aldyn alýǵa baǵyttalǵan is-sharalar keshenin iske asyrady. Áskerı bólimderde quqyq buzýshylyqtardy azaıtý úshin táýlik boıy arnaıy aldyn alý kabınetteri jumys isteıdi.
2019 jyldan bastap áskerı polısıa organdary BUU qoldaýymen bitimgerlik mısıalarǵa udaıy qatysyp keledi. Memlekettik kúzet qyzmetimen jáne İİM-men yntymaqtastyqta áskerı polısıanyń áskerı qyzmetshileri SHYU samıtteriniń, UQSHU-nyń jáne basqa da halyqaralyq forýmdardyń qaýipsizdigin qamtamasyz etý mindetterin oryndaıdy.
Tájirıbe almasý jáne qyzmettik modelderdi zertteý maqsatynda AQSH, Reseı, Ázerbaıjan jáne Armenıadan kelgen áriptesterimen kezdesýler ótkiziledi.
Kásibı daıyndalǵan mamandarmen jasaqtalǵan, zamanaýı qarý-jaraq pen tehnıkamen jaraqtalǵan áskerı polısıa eldiń qorǵanysy men qaýipsizdik júıesinde tártip pen zańdylyqty saqtaýda sheshýshi ról atqarady.