Almatylyq sıqyrshy-ıllúzıonıst Jeńis Aıtjanov úsh ret Gınnestiń rekordtar kitabyna endi. Bul joly ol óziniń eki rekordyn jeńip, tórt tıyndy qol saýsaqtarynyń arasynda aınaldyrý boıynsha úzdik atandy. Talap – tıyndardy saýsaqtardyń arasynda qolmen buraý jáne barynsha uzaq ýaqyt aınaldyrý.
Ol alǵash ret 2015 jyly qol saýsaqtarymen bir tıyndy toqtaýsyz 55 sekýnd ishinde 55 ret aınaldyryp, álemdi tańqaldyrǵan. Odan soń tórt tıyndy qol saýsaqtarynyń arasynda 14 ret 60 sekýnd ishinde shyr aınaldyrdy. Mundaı ádisti álemniń myqty degen ıllúzıonısteri qaıtalaı almaıdy. Bul joly ol óziniń aldyńǵy rekordyn buzyp, tórt tıynmen 16 aınalym jasady.
– Rekord jasaý úshin qazylar alqasy muqıat teksergen qarapaıym tıyndar paıdalanylady. Tek úsh ret talpynys jasaldy, biraq bári oıdaǵydaı ótti, – deıdi Jeńis. Qazir jas jigit taǵy da óz rekordyn jańartýǵa nıetti. Ázirge jattyǵý rejıminde ol 17 buralý jasaýda.
Tórt tıyndy azǵantaı sekýndttyń ishinde saýsaqtarynda aınaldyrý úshin qol eptiligi men oılaý júıesiniń jyldam jumys isteýi mańyzdy. Sıqyrshy Jeńis Aıtjanov osy tásildi jetik meńgergen. Eptiligimen qosa ár adamnyń psıhıkasyn ózgelerden artyq ári jyldam túsine bilýi oǵan álemdik rekord ornatýǵa kómektesti. Aıtýynsha, adamnyń kózin arbaý ádemi sóıleý arqyly júzege asatyn kórinedi. Tıyn aınaldyrýdan bólek, uıaly telefonnyń jasyryn kodyn op-ońaı tabatyn da qyry bar.
Bala kúninen ǵajaıypqa sengen Jeńis Aıtjanov 6 jasynan tylsym, jumbaqqa toly ónerge enip ketti. Ataqty sıqyrshylardyń shoýlaryn kórip, fokýstaryn úırenýge kúsh salady. Kún saıyn kórgen sıqyryn qaıtalap, qol eptiligin arttyrdy. Tıyny qolynan qaıta-qaıta túsip, túk shyqpaǵan sátte osy bir ónerdi qalaı da bolsa úırenemin degen maqsat qoıady. Negizgi mamandyǵy – ekonomıs. Biraq onyń janyna qarjygerlikten góri ıllúzıa óneri jaqyn. Aıtýynsha, rekord ornatý da ońaı sharýa emes. Sıqyrdy myqtylarǵa dáleldeý qıynnyń qıyny.
Ol aldyn ala daıyndap alǵan rekvızıtten góri, halyqtyń qolyndaǵy zattardy paıdalaný arqyly sıqyr oılap tabady. Repertýaryndaǵy fokýstarynyń jartysynyń avtory – ózi. Sondyqtan ónerin halyq shynaıy dep esepteıdi. Basty maqsaty – qazaq elinde ıllúzıa ónerin órkendetý. Ol álemniń 25 elinde óner kórsetken, «Qazaqstannyń 100 jańa esimi» jobasynyń qatysýshysy. Sondaı-aq, Jeńis qaıyrymdylyq eriktisi, óıtkeni ol ony ár adamnyń ajyramas bóligi dep sanaıdy.