Almaty qalasynda bir táýlikte 4497 adam koronavırýsqa qarsy vaksına saldyrdy
Almaty qalasynda bir táýlikte 4497 adam koronavırýsqa qarsy vaksına saldyrdy. Bul týraly qalalyq qoǵamdyq densaýlyq saqtaý basqarmasy málim etti, dep habarlaıdy Almaty-akshamy.kz QazAqparatqa silteme jasap.
«20 jeltoqsan kúni 4497 almatylyq vaksına saldyrdy. Koronavırýsqa qarsy ekpeniń İ komponentin – 1571, II komponentin – 2926 adam aldy. Vaksına saldyrǵandar sany boıynsha Almaty qalasy aldyńǵy orynda. Bıylǵy jyldyń 1 aqpany men 20 jeltoqsan aralyǵynda qalada 1 039 754 turǵyn vaksınanyń birinshi komponentin,1000 343 adam ekinshi komponentin saldyrǵan. Onyń ishinde 122 999 adamnyń jasy 60-tan asqan»,- dep habarlady basqarmadan.
Búgingi tańda Pfizer (Comirnaty) kompanıasynyń ekpesin 24 727 adam saldyrdy. Onyń ishinde 1393 júkti áıel, 4935 bala emizetin ana jáne 18399 jasóspirim bar. Qalada 132 pýnkt jumys istep tur. 756 adamnan turatyn 201 egý brıgadasy bar.
«Qazir medısına uıymdarynda, mektepterde, mádenıet, sport obektilerinde, bazarlar men qalanyń SOSO-da vaksınalaý pýnkti jumys isteıdi», - dep naqtylady densaýlyq saqtaý basqarmasynyń baspasóz qyzmeti.