Almatyda taǵam jetkizýshileri de endi tártipke baǵynatyn bolady. Polısıa departamenti endi olardyń sómkesin nómirleýdi usynyp otyr. Bul kóp jaǵdaıda jol apatynyń sebepkeri bolatyn moped pen skýter júrgizýshileriniń jaýapkershilikten qashyp qutylmaýyna túrtki bolmaq. Tártip saqshylarynyń bul bastamasyna birden 2 birdeı iri kompanıa qoldaý bildirgen.
Tamaq tasymaldaıtyn iri jelilerdiń biri sómkelerdi nómirleýdi bir jyl buryn bastapty. Barlyq qoraptyń úsh jaǵynan jeke nómirler jabystyrǵan. Al kompanıa basshylyǵy qyzmetkerlerge kúndelikti túsindirý jumystaryn júrgizedi eken. Qandaı da bir tártipbuzýshylyq bolǵan jaǵdaıda jaýapkershilikten qashpaımyz deıdi.
– Biz óz qyzmetkerlerimiz úshin qatty alańdaımyz, olardyń qaýipsizdigin qamtamasyz etkimiz keledi. Sondaı-aq, bul tutynýshylarmen keri baılanys ornatýǵa kómektesedi. Qandaı da bir aryz-shaǵym bolsa, sol nómirdi aıtyp jaýaptylarǵa habarlassa bolady. Osylaısha qyzmet sapasyn arttyrýdy kózdeımiz, – deıdi taǵam jetkizýshi kompanıanyń operasıalyq dırektory Ilham Ismaılov.
Kóbine tamaq tasýshylar qarapaıym erejelerdi eskermeıdi. Olar tapsyrysty tez jetkizý úshin keıde tipti jaıaý júrginshiler jolyna shyǵyp ketip, mopedpen adamdardy qaǵyp ketýi de múmkin. Buryndary olardy tabý múmkin bolmaıtyn. Óıtkeni, báriniń sómkesi birdeı ári onda nómirleri kórsetilmeıtin. Endi olardy nómirlese, tártipbuzýshylyq oryn alǵan jaǵdaıda izin sýytpaı, taýyp alýǵa bolady.
Al jol qaýipsizdigine jaýap beretin qaýymdastyq ókiliniń aıtýynsha, bul bastama apatty jaǵdaıdyń aldyn alý úshin jetkiliksiz deıdi. Onyń aıtýynsha, zań júzinde ózgerister engizý qajet.
– Biz İshki ister mınıstrligi men Parlament Májilisine moped sekildi kólikterdi tirkeý týraly máseleni qaıta qarastyrýdy usynyp otyrmyz. Olarǵa memlekettik nómir berilý kerek. Sonda saqtandyrýdy rásimdeý ne bolmasa jaýapkershilikke tartýdy baqylaýǵa bolady, – dedi «Jalpy jol» qaýymdastyǵynyń prezıdenti Arsen Shákýov.
Polısıa departamentiniń málimdeýinshe, jyl basynan beri taǵam tasymaldaýshylardyń qatysýymen 250-den astam jol kólik oqıǵasy tirkelgen. 270 adam zardap shegip, 5 adam qaza tapqan.