21-24 qarasha aralyǵynda Qaraǵandy qalasynda jaratylystaný-matematıka baǵytyndaǵy pánder boıynsha Respýblıkalyq HVİ Prezıdenttik Olımpıada ótti
Zıatkerlik baıqaýǵa elimizdiń barlyq aımaǵynan óńirlik jáne irikteý týrlarynyń nátıjesinde iriktelgen 199 oqýshy qatysty. Olardyń ishinde Almaty qalasyndaǵy №178 mamandandyrylǵan lıseıdiń 11 synyp oqýshylary Maral Myrzabekova men Áıgerim Toqaeva da bar, dep habarlaıdy almaty-akshamy.kz.
Bilimgerlerge matematıka, fızıka, hımıa jáne bıologıa pánderi boıynsha tapsyrmalar berildi. Olımpıadanyń negizgi maqsaty – orta bilim berý uıymdary oqýshylarynyń ishinen matematıka, fızıka, hımıa, bıologıa pánderi boıynsha daryndy balalardy anyqtaý, olardyń ıntellektýaldy damýy men kásibı baǵdar alýy úshin jaǵdaı jasaý, oqýshylardyń jaratylystaný-matematıkalyq pánderge qyzyǵýshylyǵyn arttyrý, teorıalyq bilimderi men daǵdylaryn tereńdetý, jeke tulǵa retinde qalyptasýyna jáne damýyna yqpal etý.
Prezıdenttik olımpıadaǵa qatysýshylardyń jumysyn Qazaqstannyń jetekshi joǵary oqý oryndarynyń halyqaralyq olımpıadalarynyń jeńimpazdary men júldegerleri jáne PhD doktorlary baǵalady. Baıqaý qorytyndysy boıynsha 2 oqýshy joǵary oqý ornynyń grantyn ıelense, 12 oqýshy QR Oqý-aǵartý mınıstrliginiń dıplomymen, 2 oqýshy gramotamen marapattaldy. Aıta keteıik, almatylyq eki oqýshy júzden júırik tanylyp, Maral Myrzabekova İ dárejeli dıplom-altyn medaldi, Áıgerim Toqaeva II dárejeli dıplom-kúmis medaldi jeńip aldy.