Almaty qalasy boıynsha Memlekettik kirister departamenti basshysynyń orynbasary Zańǵar Shyndaly jalpyǵa birdeı deklarasıany engizýdiń maqsaty týraly ÓKQ alańynda ótken brıfıń barysynda atap ótti, dep habarlaıdy almaty-akshamy.kz
Jalpyǵa birdeı deklarasıalaýdy engizýdiń maqsaty - tabystardyń ashyqtyǵyn qamtamasyz etý, eleýli qarjy qarajatyn alý jáne sybaılas jemqorlyq esebinen kóleńkeli ekonomıkaǵa qarsy kúres. Tabystardyń ashyqtyǵy búdjetke qosymsha túsimderge alyp keledi, bul óz kezeginde el ekonomıkasy men áleýmettik baǵdarlamalardy damytýǵa qosymsha qarajat jumsaýǵa múmkindik beredi.
“Jalpyǵa birdeı deklarasıalaýdy engizý barlyq elderdiń ekonomıkasyn damytýdyń tabıǵı baǵyty bolyp tabylady. Jalpyǵa birdeı deklarasıalaýdy tabysty engizý maqsatynda QR-da AQSH, Germanıa, Fransıa, Shvesıa, Fınlándıa, Danıa, Sıngapýr, Shveısarıa sıaqty álemniń kóptegen damyǵan elderinde qoldanylatyn progresıvti halyqaralyq tájirıbe zerdelendi” - dedi Z. Shyndalı.
Jalpyǵa birdeı deklarasıalaý salyq eseptiliginiń 2 nysanyn usynýdy kózdeıdi:
• “Aktıvter men mindettemeler týraly Deklarasıa” (250.00-nysan)
• “Kirister men múlik týraly Deklarasıa” (270.00-nysan).
Jalpyǵa birdeı deklarasıalaý júıesine kirgen kezde 250.00 nysany boıynsha deklarasıa usynylady, ol - “kirý” dep atalatyn deklarasıa, al kelesi jyldary 270.00 nysany boıynsha jyl saıynǵy deklarasıa usynylady.
Aktıvter men mindettemeler týraly deklarasıada tómendegideı málimetter kórsetiledi:
1. Qazaqstan Respýblıkasynan tys jerlerdegi múlikter:
• jyljymaıtyn múlik, jer ýchaskeleri, jer úlesteri, áýe jáne teńiz kemeleri, ishki sýda júzý kemeleri, "ózen-teńiz" júzý kemeleri;
• kólik quraldary, arnaıy tehnıka jáne tirkemeler;
• barlyq banktik salymdar boıynsha AEK mólsherinen 1000 ese asatyn somadaǵy sheteldik bankterdegi banktik shottardaǵy aqsha;
• zańdy tulǵanyń jarǵylyq kapıtalyna qatysý úlesi.
2. Qazaqstan Respýblıkasynda da, odan tys jerlerde de múlik:
• turǵyn úı qurylysyna úlestik qatysý týraly shart boıynsha turǵyn ǵımarattaǵy úlesi;
• baǵaly qaǵazdar, týyndy qarjy quraldary;
• ınvestısıalyq altyn;
• zıatkerlik menshik, avtorlyq quqyq obektileri;
• AEK mólsheriniń 10 000 eselengen sheginen aspaıtyn somada kórsetiletin qolma-qol aqsha;
• bankterge bereshekti (kredıtter, depozıtter, kartochkalyq shottar) qospaǵanda, mindettemeniń nemese talaptyń týyndaýyna negiz bolyp tabylatyn notarıat kýálandyrǵan (kýálandyrylǵan) shart nemese ózge qujat bolǵan kezde jeke tulǵa aldyndaǵy basqa tulǵalardyń bereshegi (debıtorlyq bereshek) jáne jeke tulǵanyń basqa tulǵalar aldyndaǵy bereshegi (kredıtorlyq bereshek) ;
• jeke tulǵanyń qalaýy boıynsha baǵasy 1000 eselengen AEK-ten (antıkvarlyq zattar, qymbat kartınalar jáne t.b.) asatyn basqa múlik kórsetilýi múmkin. Baǵalaýdy táýelsiz baǵalaýshydan jasaýǵa bolady.