Jalpyǵa birdeı deklarasıalaýdyń úshinshi kezeńinde 370 myńnan astam almatylyq deklarasıalanýǵa jatady
2021 jyldan bastap Qazaqstan azamattarynyń jalpyǵa birdeı Deklarasıalaý júıesine kezeń-kezeńimen kirýi júrgizilýde. Deklarasıalaýdyń kelesi kezeńderi kimdi qamtyp ótetinin ÓKQ brıfıńinde Almaty qalasy boıynsha Memlekettik kirister departamenti basshysynyń orynbasary Zańǵar Shyndaly atap ótti, dep habarlaıdy almaty-akshamy.kz
Memlekettik organnyń aqparaty sáıkes, jalpyǵa birdeı deklarasıalaýdyń birinshi kezeńinde Almaty qalasynda 46 myńnan astam jeke tulǵa, ıaǵnı memlekettik qyzmetshiler, olarǵa teńestirilgen adamdar men olardyń jubaılary deklarasıa tapsyrdy.
Ekinshi kezeń 2023 jyly bastaldy jáne jalpyǵa birdeı deklarasıalaý júıesine kvazımemlekettik sektor, mádenıet qyzmetkerleri, muǵalimder, dárigerler, sportshylar jáne olardyń jubaılary kirdi. Almaty qalasy boıynsha deklarasıany 142 myńnan astam tulǵa tapsyrdy.
Jalpyǵa birdeı deklarasıalaýdyń úshinshi kezeńinde ıaǵnı 2024 jylǵy 1 qańtardan bastap deklarasıany usyný boıynsha mindettemeler bıznes ókilderi men olardyń jubaılarynda, zańdy tulǵalardyń basshylarynda, quryltaıshylarynda (qatysýshylarynda), jeke kásipkerlerde týyndaıdy.
“Bul rette, bul mindet "áreketsiz" mártebesi bar jeke kásipkerlerge jáne JSHS basshylaryna (quryltaıshylaryna) da qatysty bolady. Iaǵnı, qoldanystaǵy nemese áreketsizdigine qaramastan, 2024 jyldyń 1 qańtaryndaǵy jaǵdaı boıynsha QR Qarjy mınıstrliginiń Memlekettik kirister komıteti bazasynda tirkelgen barlyq JK jáne zańdy tulǵa deklarasıalanýǵa jatady”, - dep atap ótti Z. Shyndalı.
Osylaısha, Almaty qalasynda erli-zaıyptylardy eseptemegende 3-shi kezeńde deklarasıalanatyn tulǵalar sany 378 myń bolmaq.
Sońǵy 4 kezeń, 2025 jylǵy 1 qańtardan bastap-jalpyǵa birdeı deklarasıalaý júıesine tolyq kirý, ıaǵnı kámeletke tolmaǵandardy qospaǵanda, respýblıkanyń barlyq azamattary deklarasıa tapsyrýǵa mindetti bolady. Biraq kámeletke tolmaǵan adamdar:
- menshik quqyǵynda Qazaqstan Respýblıkasynan tys jerlerdegi múlik bolsa;
- qurylysqa úlestik qatysý týraly shart boıynsha, onyń ishinde Qazaqstan Respýblıkasynan tys jerlerde jyljymaıtyn múlik qurylysynda úles bolsa;
- Qazaqstan Respýblıkasynan tys jerlerdegi sheteldik bankterdegi banktik shottarda barlyq banktik salymdar boıynsha aılyq eseptik kórsetkishtiń myń eselengen mólsherinen jıyntyq asatyn aqsha somasy bar bolǵan jaǵdaıda deklarasıalanýǵa jatady.