Shekti baldy 67%-ǵa jýyq talapker jınady.
Naýryz aıyndaǵy UBT-nyń eki aptasynda 54 myńnan astam adam test tapsyrdy, dep habarlaıdy aqshamnews.kz ǵylym jáne joǵary bilim mınıstrligine silteme jasap.
Testileý nátıjesi boıynsha ortasha bal bes pán boıynsha 62 baldy quraǵan. Eń joǵary bal – 139, ony almatylyq talapker jınady.
Talapkerler úsh tilde test tapsyrdy:
qazaq tilinde - 67,4%;
orys tilinde - 32,5%;
aǵylshyn tilinde - 84 adam.
Talapkerler tańdaǵan pánder:
"Matematıka-Fızıka" pánder kombınasıasyn - 18,6%;
"Shyǵarmashylyq emtıhan" - 14,7%;
"Bıologıa-Hımıa" kombınasıasyn - 13,3%;
"Hımıa-Fızıka" pánder kombınasıasyn 65 adam tapsyrǵan.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda naýryz UBT-syna 169 talapker qatysty.
Talapkerler testileý aıaqtalǵannan keıin 30 mınýt ishinde apelásıaǵa bere alady, bul jaǵdaıda sertıfıkat apelásıa týraly sheshim qabyldanǵannan keıin testilenýshiniń jeke kabınetinde qoljetimdi bolady.
"Qazirgi tańda 57 adamnyń nátıjesi joıyldy. Onyń ishinde 26 talapker smartfon jáne shpargalka sıaqty tyıym salynǵan zattardy alyp ótý áreketi saldarynan test tapsyrý múmkindiginen aıyryldy, al testileý kezinde erejelerdi buzǵany úshin aýdıtorıadan 31 adam shyǵaryldy. Testke basqa adamdy kirgizý faktileri anyqtalǵan joq", - delingen habarlamada.
Aıta ketsek, 2025 jylǵy UBT aıaqtalǵannan keıin 31 qazanǵa deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda talapkerdiń UBT nátıjeleri joıylady.
Esterińizge sala ketsek, naýryz UBT-sy 1 naýryz ben 6 sáýir aralyǵynda ótedi. Testileýge qatysýǵa 163 myńǵa jýyq talapker nıet bildirgen.