Almatyda tuńǵysh ret 1 maýsymda Respýblıka saraıynda «Jas qanat. Balalar – 2023» respýblıkalyq balalar shyǵarmashylyq baıqaýy ótti.
Osy baıqaýda “Vokal” nomınasıasy boıynsha Almaty qalasy Oqýshylar saraıynyń túlegi Dastan Turdaly “Samal Taý” qazaq halyq ánimen Gran-prı ıegeri atandy. Endi ol shilde aıynda «Medeý» muz aıdynynda ótetin «Azıa daýysy» halyqaralyq festıvalinde Qazaqstannyń namysyn qorǵaıdy, dep habarlaıdy Almaty-akshamy.kz
Júldeli oryndar tómendegideı bólindi:
1-oryndy Túrkistan oblysynan Zere Júnisbaı,
2-oryndy Mańǵystaýlyq Ámına Asgatova,
3-oryndy Aqtóbe oblysynan Balym Nsanaly ıelendi.
Jeńimpazdarǵa altyn, kúmis jáne qola qanattardan bólek, aldaǵy «Azıa daýysy» halyqaralyq festıvaline daıyndyq jumystary úshin Almaty qalasynyń ákimi Erbolat Dosaevtyń aqshalaı granttary tabys etildi.
«Gran-prı alǵan kezde qatty qýandym jáne tolqyp kettim. Mýzykaǵa alǵashqy qadamdarymdy 3 jasymda bastaǵan edim, vokalǵa 5 jasymnan bastap bardym. Sodan beri kóptegen respýblıkalyq jáne halyqaralyq baıqaýlarǵa qatystym. Osyndaı jetistikterge jetýime ata-anam, Oqýshylar saraıynyń ustazdary kómektesti. Bolashaqta alǵan betimnen qaıtpaı, óz kýmırim Dımash aǵa sıaqty stadıondarda, úlken sahnalarda óner kórsetýdi armandaımyn», - deıdi Dastan Turdaly.
Baıqaýdy uıymdastyrýshylardyń aıtýynsha, «Jas qanat. Balalar – 2023» ańyzǵa aınalǵan «Jas qanat» baıqaýynyń tarıhyndaǵy jańa baǵyt bolmaq. Elimizdiń barlyq oblystarynan kelgen 22 úmitkerdiń ónerin respýblıkalyq estrada sheberi Álibek Dinishev, «Jas qanat» baıqaýynyń birinshi Gran-prı ıegeri Medeý Arynbaev, Jánıa Áýbákirova, Baıǵalı Serkebaev jáne basqa da belgili mádenıet jáne óner qaıratkerleri baǵalady.