Mamannyń aıtýynsha, búırek isigi negizinen 50-70 jas aralyǵyndaǵy adamdarda kezdesedi, degenmen bul aýrý jasóspirimderde, tipti balalarda da kezdesedi.
Almaty onkologıalyq ortalyǵynyń onkolog-dárigeri Kamıl Hashırov Almatyda anyqtalǵan qaterli isikterdiń 3,6 paıyzyn búırektiń qaterli isigi quraıtynyn atap ótti, dep habarlaıdy Almaty-akshamy.kz
Tek 2021 jyldyń ózinde alǵash ret búırektiń qaterli isigimen 164 adam esepke turǵan. Bul aýrýmen 1116 naýqas esepte tur.
«Temeki shegý, artyq salmaq, aýyrǵandy basatyn dárilerdi kóp paıdalaný bul isiktiń damýynyń keıbir faktorlary bolyp sanalady. Sondaı-aq, kásiptik faktorlar, mysaly, metalýrgıalyq ónerkásiptegi, bylǵary óndirisindegi jáne t.b. jumysshylar arasynda bul aýrýdyń qaýpi joǵary bolmaq. Sondaı-aq, otbasylyq búırektiń qaterli isigi jaǵdaıynda týyndaıtyn genetıkalyq faktorlar oryn alady, mysaly, Fon Hıppel-Lındaý sındromy. Mundaı jaǵdaılarda aýrýdyń jas kezinde damýy, eki búırekte de isikterdiń jıi asqynýy saldarynan búırekte kóptegen qaterli isik oshaqtary paıda bolady", - dep atap ótti onkolog. Búırekterdiń adam denesiniń tereńinde ornalasqanyn atap ótý jón, kóbinese isikter óte uzaq ýaqyt boıy ósip, olardy aldyn ala baıqaǵanǵa deıin úlken bolyp óse beredi. Mamannyń aıtýynsha, búırektiń qaterli isiginiń eń jıi kezdesetin belgisiniń biri bolyp nesepte qannyń paıda bolýy. Sońynan neseppen birge uıyǵan qan bolyp aǵatyn nesep jolynda qannyń uıyp qalýynyń saldarynan búırek ornalasqan jer qatty aýyrsynady. Belomyrtqa jaqtyń aýyrsynýy kóbinese búırektiń qaterli isiginiń bastalýynan bolady. Sondyqtan da, onkolog aldyn ala tekseristen ótý jaıly taǵy da eskertedi. «Medısınalyq tekseristen ótýden qoryqpaý kerek. Alǵashqy satysynda anyqtalǵan qaterli isik tez jáne tolyǵymen emdeledi. Alǵashqy satydaǵy dıagnozdy anyqtaý - bul sońǵy kesim emes, kerisinshe, osy aýrýmen kúresip qutylý múmkindigi men bolashaqta jarqyn ómir súrý», - dedi ol sóziniń sońynda.