Keńeske ýákiletti memlekettik organdar men Ulttyq bank ókilderi qatysty.
Búgin Qazaqstan Respýblıkasy Premer-Mınıstriniń orynbasary Eraly Toǵjanovtyń tóraǵalyǵymen oıyn bıznesi men lotereıa qyzmetin retteý máseleleri jóninde keńes ótti, dep habarlaıdy Almaty-akshamy.kz
Keńeske ýákiletti memlekettik organdar men Ulttyq bank ókilderi qatysty. Mádenıet jáne sport vıse-mınıstri Erjan Erkinbaev Mólsherlemelerdi esepke alý ortalyǵyn qurý, onlaın-kazınolarǵa qarsy is-qımyl boıynsha zańnamalyq túzetýlerdi qabyldaý, oıyn baǵytyndaǵy ınternet-saıttardy buǵattaý, lotereıa bıznesin retteý máseleleri boıynsha tapsyrmalardyń oryndalý barysy týraly baıandady.
Vıse-premer onlaın-kazıno saıttarynyń qol jetimdiligi men keńinen taralýy halyqtyń qumar oıyndarǵa tartylýynyń negizgi sebepteri ekendigin atap ótti. Memlekettik organdarda mundaı saıttardyń sany, qumar oıyndarǵa táýeldi adamdar jáne azamattardyń onlaın kazınoǵa jumsaǵan qarajatynyń kólemi týraly derekter joq.
E.Toǵjanov Mólsherlemelerdi esepke alý ortalyǵynyń Mádenıet jáne sport mınıstrligi bazasynda qurylýy tıis ekenin atap ótti. Keńesti qorytyndylaı kelle, Eraly Toǵjanov memlekettik organdarǵa birqatar naqty tapsyrmalar berdi. Atap aıtqanda:
️ zańsyz oıyn bıznesine qarsy is-qımyl jáne azamattardyń qumar oıyndarǵa tartylý deńgeıin tómendetý boıynsha birlesken is-qımyl josparyn ázirleý;
️ qumar oıyndardyń zıany týraly áleýmettik rolıkter jasaý jáne nasıhattaý;
️ qoǵam ókilderin tarta otyryp, zańsyz oıyn oryndaryn anyqtaý boıynsha reıdter ótkizý;
️ ınternet-kazınony uıymdastyrý qyzmetin júzege asyratyn tulǵalardyń tizimin belgileý;
️ bankter men tólem júıelerine osy tulǵalardyń paıdasyna qarjy operasıalaryn júrgizýge tyıym salýdy belgileý;
️ nesıe kartalarynyń kómegimen kazınolarda, oıyn avtomattary zaldarynda, býkmekerlik keńselerde jáne totalızatorlarda tólemderdi júzege asyrýǵa nemese shottardy tolyqtyrýǵa tyıym salý;
️ ınternet-kazınony uıymdastyrǵany úshin jaýapkershilik belgileý;
️ qumar oıyndarǵa táýeldi azamattardy, onyń ishinde balalardy anyqtaý jáne ońaltý júıesin ázirleý.