Ortalyq qalalyq klınıkalyq aýrýhana dárigerleri kúrdeli ota jasap, 69 jastaǵy naýqasqa qaıta ómir syılady. Operasıa mindetti áleýmettik medısınalyq saqtandyrý esebinen jasaldy.
OQKA baspasóz qyzmetiniń málimetinshe, pasıent aýrýhanaǵa shuǵyl túrde jetkizilgen. Jedel járdemmen kelgen kezde nevrologıalyq aýytqýlar baıqalyp, sol jaq aıaǵy men qoly jansyzdanyp, qımyldamaı qalǵan bolatyn, dep habarlaıdy neırohırýrg Ermek Súleımenov.
Kezekshiliktegi nevropatolog, neırohırýrg, anestızıolog dárigerler brıgadasy shuǵyl ota jasaý týraly sheshim qabyldady. Der kezinde qabyldanǵan sheshimniń arqasynda naýqas óz betimen júrip-turýǵa múmkindik aldy.
«Ishemıalyq ınsýlt bolǵandyqtan qaýip kúsheıdi. Operasıa jasaldy, selektıvti serebraldy angıografıa men mıdyń ortańǵy kúretamyryndaǵy uıyǵan trombty alyp tastadyq», – deıdi Ermek Súleımenov.
Neırohırýrgterdiń biliktiligi arqasynda uıyǵan qan alyp tastalyp, mıdyń ortańǵy kúretamyryndaǵy qan aınalymy qalpyna keltirildi. Bas súıek pen mıdaǵy júıke talshyqtary da tolyq qalypqa keldi.
Bir aptadan keıin pasıenttiń jansyzdanǵan aıaǵy men qoly qozǵala bastady. Qozǵalys kúshi arnaıy baǵan boıynsha tórt balǵa jetti, bul óz kezeginde naýqasty saldary aýyr bolatyn múgedektikten saqtaıtyn kórsetkish deıdi maman.
MÁMS arqyly jasalǵan ota 1 saǵat 10 mınýtta aıaqtaldy. Bul aýrýhana mamandarynyń biliktiligin ǵana emes, syn saǵatta qabyldanǵan sheshimderdiń de tıimdiligin kórsetse kerek.