Almatylyq neırohırýrgtar 35 jastaǵy naýqastyń mıyndaǵy úlken epıleptogendi oshaqty alyp tastap, ony epılepsıadan qutqardy, dep habarlaıdy almaty-akshamy.kz
Ortalyq qalalyq klınıkalyq aýrýhana neırohırýrgtary alǵash ret farmakorezıstenttik epılepsıasy bar naýqasqa óte kúrdeli ota jasady - mıdyń samaı bóliginiń rezeksıasymen sol jaq amıgdalohıppokampektomıa.
Naýqas atalǵan dertpen 20 jasynan aýyrǵan. Sońǵy ýaqytta naýqasqa ustamaǵa qarsy preparattar kómektespegen. Jaǵdaıdyń ýshyqqany sonshalyq, ustamalar toqtamastan birinen soń biri bolatyn bolǵan.
Dárigerler barlyq qajetti tekserý júrgizgen. MRT naýqastyń mıynyń sol jaq samaı bóliginde epıleptıformdy belsendiliktiń oshaǵyn anyqtady.
Neırohırýrgıa bólimishesiniń meńgerýshisi Marat Almatov Novosıbırskten kelgen neırohırýrg Aleksandr Dmıtrıevpen birlese otyryp, sheberlik synyby aıasynda, neıronavıgasıa jáne mı qyrtysyn tikeleı jazý arqyly elektrokortıkografıa kómegimen naýqastyń sol jaq gıppokampyn mıkrohırýrgıalyq jolmen alyp tastaý operasıasyn jasady.
«Dıametri 3*3 sm bolatyn úlken oń jaq mańdaı bóligindegi epıleptogendi oshaqty alyp tastadyq. Ota naýqasta nevrologıalyq jetispeýshilik týyndatpaı, sátti ótti. Otadan keıin naýqasta epıleptıkalyq ustama tirkelmedi. Jasalǵan ota naýqastyń ómir súrý sapasyn jaqsartady dep úmittenemiz», - deıdi Marat Almatov.
Mıǵa ota jasaý, jalpy kez kelgen aralasý júrgizý óte kúrdeli sheshim ekeni belgili. Bundaı ota kezinde árqashan da táýkelge bel býyp, jumysty úlken jaýapkershilikpen jáne asqan saqtyqpen jasaý qajet.
Almatovtyń aıtýy boıynsha, epılepsıa - keńinen taralǵan jáne óte kúrdeli nevrologıalyq aýrý, ol mı bólikterine úlken zaqym keltiredi.
Aýrý patogenezi mıdyń neırondarynda ustamany týdyratyn paroksızmaldy razrádtarǵa negizdelgen.
Aýrýdyń sebebi tolyǵymen zerttelmegen, epılepsıa týa bitken bolýy múmkin, mı qurylymyndaǵy ózgeristerge negizdelýi múmkin nemese kez kelgen bas-mı jaraqatynan soń paıda bolýy múmkin.
Atalǵan ota naýqasqa MÁMS sheńberinde jasaldy.