Álemde eń kóp taraǵan derttiń biri - júrek-qan tamyrlary aýrýy
Bul týraly Kardıologıa jáne ishki aýrýlar ǵylymı-zertteý ınstıtýty (ǴZI) joǵary sanatty kardıolog dárigeri Juldyzaı Egembaeva aıtty, dep habarlaıdy Almaty-akshamy.kz.
Onyń aıtýynsha, jyl saıyn álemde 20 mln-ǵa jýyq adam júrek-qan tamyrlary aýrýlarynan kóz jumady. Bul Beıjiń, Shanhaı, Tokıo, Delı sıaqty iri megapolıstiń halqymen teń. Qazaqstandaǵy júrek-qan tarmyrlary aýrýlaryna keler bolsaq, jaǵdaı máz emes.
«Qazaqstanda árbir 33-shi turǵynda qan aınalym júıesi aýrýlarynyń sımptomdary, árbir 12-shi turǵynda joǵary qan qysymynyń klınıkalyq sımptomdary bar. 19 mıllıonnan 1,5 mln adam arterıalyq gıpertonıa boıynsha esepte tur. Júrektiń ıshemıalyq aýrýy jáne gıpertonıanyń úlesine qan aınalymy júıesiniń barlyq buzylystarynyń 60%-y tıesili»,- deıdi Juldyzaı Egembaeva .
Dúnıejúzilik júrek federasıasynyń málimetteri boıynsha, eger salaýatty ómir saltyn ustanyp, temeki shegý, tamaqtaný jáne dene qımylynyń belsendiligi baqylanatyn bolsa, ınfarkt pen ınsýlttan bolatyn mezgilsiz ólimniń 80%-nyń aldyn alýǵa bolady.
Júrek-qan tamyrlary aýrýlaryna shaldyqqan nemese joǵary qan qysymy, qant dıabeti, gıperlıpıdemıa nemese damyp kele jatqan aýrý bolǵan jaǵdaıda mundaı aýrýlardyń qaýpi joǵary adamdar erte anyqtaýdy jáne keńes berý arqyly, qajet bolǵan jaǵdaıda dári-dármekterdi qabyldaýdy qajet etedi.
«Sońǵy jyldary júrek-qan tamyrlary aýrýlarynyń, onyń ishinde eńbekke qabiletti jastaǵy erler men áıelder arasynda mıokard ınfarktisiniń «jasarýynyń» turaqty úrdisi baıqalyp otyr», - deıdi kardıolog.
Dárigerdiń sózinshe, zamanaýı dıagnostıkanyń deńgeıi patologıalyq proses qaıtymdy jáne emdelýge keletin júrek-qantamyr júıesiniń kóptegen aýrýlaryn erte kezeńde anyqtaýǵa múmkindik beredi.