«Raıymbek batyr» stansıasynda metropolıtenniń zamanaýı qaýipsizdik standarttaryna sáıkes keletin jańa ýaqytsha qorshaýlar ornatyldy.
Olar eki negizgi qyzmet atqarady: jolaýshylar úshin qorǵanys quraly bolyp tabylady jáne jarnamalyq qurylym retinde paıdalanylady, dep habarlaıdy aqshamnews.kz.
Qazirgi ýaqytta bul qorshaýlardyń jel júktemesine tózimdiligi tekserilýde. Barlyq qajetti synaqtardan ótkennen keıin osyndaı qorshaýlar metronyń basqa stansıalarynda da ornatylatyn bolady. Sonymen qatar, metropolıten ókilderi buryn ornatylǵan temir qorshaýlardyń da tekserilip jatqanyn, qajet bolǵan jaǵdaıda olardyń alynatynyn atap ótti.
«Almaty metropolıteni jolaýshylardyń jaılylyǵy úshin ınfraqurylymdy jetildirýge árdaıym umtylady. Bul sheshim avtomattandyrylǵan platformalyq esikter (screen doors) ornatylǵanǵa deıingi ýaqytsha shara bolyp tabylady. Barlyq jumystar kásiporynnyń óz qarajaty esebinen, búdjet qarajatyn tartpaı júrgizilýde», – dep habarlady metropolıtenniń baspasóz qyzmeti.
Aıta keteıik, ýaqytsha qorshaýlar vagondar arasyndaǵy keńistikti jabýǵa arnalǵan jáne jolaýshylardyń qaýipsizdigin arttyrýǵa baǵyttalǵan ýaqytsha sheshim bolyp tabylady. Avtomattandyrylǵan platformalyq esikterdi (screen doors) ornatý prosesi kóp ýaqytty qajet etedi, óıtkeni jobalaý, tehnıkalyq-ekonomıkalyq negizdeme daıyndaý, qarjylandyrý jáne memlekettik satyp alý rásimderin ótkizý qajet. Osyǵan baılanysty, jolaýshylardyń qaýipsizdigin qamtamasyz etý maqsatynda ýaqytsha qorshaýlar ornatylýda.