Bıylǵy jyldyń birinshi toqsanynda Almaty turǵyndaryna kórsetilgen medısınalyq kómek sapasyn baqylaý barysynda 58 myń qyzmettiń túrli kemshiliktermen kórsetilgeni anyqtaldy6 dep habarlaıdy almaty-akshamy.kz
Nátıjesinde qaladaǵy emdeý mekemelerine 265 mln teńge aıyppul salyndy. Bul týraly búgin «Áleýmettik medısınalyq saqtandyrý qory» KEAQ Almaty fılıaly dırektorynyń orynbasary Janar Kenjebaeva habarlady.
Aıtýynsha, kemshiliktiń basym bóligi bastapqy medısınalyq-sanıtarlyq kómek kórsetetin emhanalardan anyqtalyp otyr. Olar 57 myńnan astam qyzmetti kemshiliktermen kórsetkeni úshin 150 mln teńge kóleminde aıyppul arqalady.
Sonymen qatar, aqaýmen kórsetilgen 680 qyzmet – stasıonarlar men stasıonardy almastyratyn kómek uıymdaryna tıesili. Atalǵan kemshilikter úshin 100 mln teńge aıyppul salynǵan.
«Monıtorıń barysynda anyqtalǵan kemshilikterdiń deni emdeý-dıagnostıka barysynda belgilengen standarttardan aýytqý, medısınalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa kelip saıady. Sonymen qatar, «kórsetildi» dep jazylǵan belgili bir qyzmet túrleriniń shyn máninde kórsetilgenin rastaı almaǵan klınıkalar da bar», – dedi Janar Kenjebaeva.
Buǵan deıin habarlanǵandaı, MSQ kórsetilgen qyzmet sapasyna turaqty baqylaý júrgizip otyrady. Búginde dáriger kómegine júginbegen adamdy «qabyldaýda boldy» dep jazý máselesi jurtshylyq arasynda ózekti máselege aınalǵany belgili. Bıylǵy qańtar-naýryz aılary aralyǵynda fılıal mamandary azamattardan túsken aryz-shaǵymdar nátıjesinde osyndaı 50 faktini anyqtap, emhana-ambýlatorıa deńgeıinde júrgizilgen monıtorıń barysynda medısına uıymdaryna 1,5 mln teńge aıyppul saldy. Qaıtaryp alynǵan qarajat medısınalyq kómektiń ózge túrlerine jumsalady, dedi fılıal basshysynyń orynbasary.
Esterińizge sala ketsek, ońtústik astanada 226 medısına uıymy tegin medısınalyq kómek jáne MÁMS paketteri sheńberinde qyzmet kórsetedi.