2023 jyldyń birinshi toqsanynda ońtústik astanalyqtarǵa mindetti áleýmettik medısınalyq saqtandyrý esebinen 52,8 mlrd teńgege medısınalyq kómek kórsetildi. Bul týraly búgingi brıfıńte MSQ Almaty qalalyq fılıaly dırektorynyń orynbasary Janar Kenjebaeva habarlady.
Aıtýynsha, jyl saıyn medısınalyq saqtandyrý esebinen kardıohırýrgıa, neırohırýrgıa, ýrologıa, travmatologıa, onkologıa, hırýrgıa syndy taǵy da basqa profılder boıynsha júzdegen operasıa jasalyp jatyr. Osyndaı bir ǵana kúrdeli otanyń quny orta eseppen birneshe mıllıon teńgege jetip jyǵylady.
«Mysaly, birinshi toqsanda Almaty qalasynda 404 kardıohırýrgıalyq operasıa jasalyp, oǵan 2,1 mlrd teńge tólengen. Sonymen qatar, 1 mlrd teńgege 193 neırohırýrgıalyq ota jasalǵan. Taǵy 118,1 mln teńgeni MSQ lor-profıli boıynsha jasalǵan 16 operasıaǵa jumsady», - dedi Janar Kenjebaeva.
Búginde artroz, artrıt syndy býyn aýrýlarynyń kóbeıýine baılanysty tize, jambas býyndaryn almastyrýshylar sany kúrt artyp otyr. 2023 jyly almatylyq travmatologtar osyndaı 1100-den astam operasıa jasady. Oǵan Qor tarapynan 1,6 mlrd teńge tólendi, deıdi fılıal ókili.
Sondaı-aq, jalpy quny 256,1 mln teńgeden asatyn 35 aǵza almastyrý operasıasy jasalǵan. Sonyń ishinde 27 búırek-baýyr almastyrý operasıasy da bar.
«Bir qaraǵanda, munyń bári jaı ǵana sıfr bolyp kórinýi múmkin. Shyn máninde, saqtandyrylǵan azamattardyń qaltasynan shyǵatyn shyǵyn edáýir qysqaryp, olar osynsha qyzmetti tegin paıdalanyp otyr», - dep qorytty Janar Kenjebaeva.