Óńirlik komýnıkasıalar qyzmetiniń alańynda «Arnaıy jáne ınklúzıvti bilim berýdi damytýdyń ulttyq ǵylymı-praktıkalyq ortalyǵy» ókilderiniń qatysýymen baspasóz máslıhaty ótti, dep habarlaıdy almaty-akshamy.kz
Ońaltý jáne jańa tehnologıalardy engizý bóliminiń meńgerýshisi, joǵary sanatty pedagog-psıholog Záýre Jangeldınova ortalyqta 31 naýryzda ortalyqta Dúnıejúzilik aýtızm týraly aqparattandyrý kúnine arnalǵan respýblıkalyq semınar ótetinin aıtty.
Mamandar dúnıe júzinde, onyń ishinde Qazaqstanda aýtızmmen aýyratyn balalardyń sany artyp kele jatqanyn aıtýda. Statısıkaǵa sáıkes, erte jastaǵy aýtızmmen aýyratyn balalardyń sany 1052 bala, mektep jasyna deıingi balalar (3 jastan 5 jasqa deıin) – 4331 bala, 6 jastan 18 jasqa deıingi balalar – 6704 bala.
«Biz aýtızmmen aýyratyn balalardyń jasyna qaraı olardyń sany kóbeıgenin baıqaımyz. Onyń sebepteriniń biri – erte jastan aýtızmmen aýyratyn balalarǵa psıhologıalyq-pedagogıkalyq kómek kórsetýdiń jetkiliksiz bolýy, balanyń damýyna erte aralasýdyń bolmaýy. Qazirgi zamanda erte aralasýdyń mańyzdylyǵy týraly aıtylyp júrgenimen, álemdik statısıka erte túzetý kómegi bar aýtızmmen aýyratyn balalardyń 60-70 paıyzy qoǵamda jaqsy beıimdelip, áleýmettenetinin kórsetedi», - dep túsindirdi Z.Jangeldınova.
Bizdiń elimizde 208 psıhologıalyq-pedagogıkalyq túzetý kabıneti jáne 18 jasqa deıingi balalarǵa jeke nemese toptyq túrde kómek kórsetetin 13 respýblıkalyq ortalyq bar. Sondaı-aq 44 arnaıy jáne jalpy bilim beretin mektepke deıingi uıymdarda jáne 9 aýtızm ortalyǵynda aýtızmmen aýyratyn balalarǵa psıhologıalyq-pedagogıkalyq kómek kórsetiledi.
Ortalyqtyń málimetinshe, 2022 jyly aýtızmge shaldyqqan 1789 balaǵa, RO - 288 balaǵa, aýtızm ortalyǵynda 733 balaǵa psıhologıalyq-pedagogıkalyq kómek kórsetilgen.
2020 jyly otandyq mamandar aýtızmmen aýyratyn balanyń qarym-qatynasyna, áleýmettik ózara árekettesýine jáne áleýmettenýine baǵyttalǵan arnaıy damytý baǵdarlamasyn ázirledi. Búginde ol ońaltý ortalyqtarynda, psıhologıalyq-pedagogıkalyq túzetý kabınetterinde, arnaıy jáne jalpy bilim beretin mektepke deıingi bilim berý uıymdarynda qoldanylady.
Ońaltý jáne jańa tehnologıalardy engizý bóliminiń pedagog-psıhology Ásel Baqtyǵalı aýtızmmen aýyratyn balalardyń 90 paıyzynda sensorlyq ıntegrasıanyń buzylýy, ıaǵnı sensorlyq ıntegrasıanyń dısfýnksıasy bar ekenin aıtady. Sensorlyq ıntegrasıalyq terapıa aýtızmi bar balanyń minez-qulqy men damýyn uıymdastyrýdyń tıimdi ádisi bolyp tabylady.
«Aýtızmi bar balalar mıy sensorlyq aqparatty tirkemeıdi, bul qalaýsyz nemese aýlaq júretin áreketterge ákeledi. Kóbinese mundaı balalardyń mıy qaýipti sezbeıdi jáne bala odan tájirıbe almaıdy», - deıdi ol.