Qazaqstan Respýblıkasy Ulttyq qaýipsizdik komıteti Shekara akademıasynda «Jas shekarashy» balalar áskerı-patrıottyq klýbynyń saltanatty túrde ashylý rásimi ótti, dep habarlaıdy Almaty-akshamy.kz QR UQK Shekara akademıasynyń baspasóz qyzmetine silteme jasap.
Oǵan SOS Almaty «Balalar qalashyǵynyń» tárbıelenýshileri men Shekara akademıasynda qyzmet atqaratyn áskerı qyzmetshilerdiń balalary qabyldandy. Atalmysh sharany tárbıelik, áleýmettik-quqyqtyq jáne ıdeologıalyq jumystar basqarmasy uıymdastyrdy.
Bul joly ata-analar balalaryna shekarashynyń kıimin tiktiripti. Ústerindegi kıimderi ózderine quıyp qoıǵandaı shap-shaq. Bastarynda jasyl qalpaq. Tipti keıbireýi kánigi shekarashylar sıaqty kishkentaı bersy (aıaq kıim) kıip alypty. Búgingi kórgen qyzyqtaryna kóńili tolyp, júzi bal-bul jaınap turǵan jas shekarashy Týkeshov Bekarys Qanatuly ákesi sekildi shekarashy bolǵandy qalap, kóp oılanbastan «Jas shekarashy» balalar áskerı-patrıottyq klýby ashylady degen aqparatty estı sala, osynda kelýdi jón kórgen. Endi ol áskerı bólimniń saptyq alańynda klýbqa qabyldanǵan balalarmen birge bir syzyqtyń boıynda sap túzep tur.
Sharaǵa jas shekarashylar men olardyń ata-analarynan bólek, shekarashy ardagerlerdiń «Zastava tarlandary» Respýblıkalyq qoǵamdyq birlestigi Almaty qalalyq fılıalynyń tóraǵasy, zapastaǵy general-maıor M.Majıtov jáne osy birlestiktiń músheleri, otstavkadaǵy polkovnıkter V.Dybov, Q.Ertyshpaevtar qonaq retinde shaqyrylypty. Óz kezeginde Marat Álimjanuly sóz sóılep, qasterli shekarashy mamandyǵynyń qyr-syryna toqtalyp, búgingi kishkentaı shekarashylardyń aldaǵy qyzmetine sáttilik tiledi.
Sodan keıin rásim boıynsha akademıa bastyǵy polkovnık P.Polıvanov pen shaqyrylǵan qonaqtar «Jas shekarashy» balalar áskerı-patrıottyq klýbyna qabyldanǵan balalarǵa arnaıy daıyndalǵan emblema shevrony men maqtaý gramotalaryn saltanatty túrde tabys etti.
Shara barysynda akademıa bastyǵy polkovnık P.Polıvanov Otannyń otbasynan bastalatynyn, Otan qorǵaýdyń arly is ekenin aıta kelip, barlyq balalardy klýbqa qabyldanǵanýymen shyn júrekten quttyqtady.
Polkovnık D.Belgojaevtyń aıtýynsha, atalmysh klýb jumysyn aıyna eki ret tańǵy toǵyzdan túski on ekige deıin júrgizetin bolady. Balalarǵa sabaqty akademıadaǵy áskerı qyzmetshiler ótkizedi. Klýb jetekshisi bolyp maıor Asqarov Jeńis taǵaıyndaldy. Al onyń kómekshisi bolyp 3 synypty serjant Eızjanov Erlan bekitildi.