Aýtızmmen aýyratyn balalar úshin olardyń minez-qulqyn retteý jáne qorshaǵan álemge beıimdelý úshin sensorlyq sezimderdi alý óte mańyzdy. Osy maqsattarda mamandar aýtızmmen aýyratyn balalardyń minez-qulqyn retteýge jáne beıimdelýge kómektesetin sensorlyq oıyndardyń ádisin paıdalanady.
Óz kezeginde ońaltý jáne jańa tehnologıalardy engizý bóliminiń pedagog-logopedi Janar Estemesova aýtızmge shaldyqqan balalarmen jumys jasaýda balamaly jáne qosymsha qarym-qatynas quraldaryn qoldaný qajet ekendigimen bólisti. Bul dıagnozy bar keıbir balalar ózderiniń qajettilikteri men tilekterin aýyzsha aıta almaıdy, basqalarynda jaqyn adamdarymen qarym-qatynasta sóıleý kezinde qıyndyqtar bolady.
«Balamaly jáne qosymsha qarym-qatynas ádisteri - bul sóz ben ony tolyqtyratyn qyzmetterdi qajet etpeı-aq, balanyń otbasyndaǵy qarym-qatynasyn jaqsartýǵa yqpal etetin qarym-qatynas ádisteri. Onyń ústine biz kúndelikti ómirde osyndaı qarym-qatynas ádisterin qoldanamyz. Bul, mysaly, jol belgileri, kıim japsyrmalary, qoǵamdyq dárethanalardy kórsetetin belgiler jáne t.b. Balamaly komýnıkasıa degenimiz - adamnyń sóılemeı jáne jazbaı-aq, kez kelgen aqparatty berý nemese qabyldaýdyń barlyq tásilderi. Al qosymsha komýnıkasıa degenimiz – aqparatty zattardyń, ym-ısharanyń jáne grafıkalyq belgilerdiń kómegimen jetkizý tásili», - dep atap ótti J.Estemesova.
Bul rette baılanys quraldary tómen tehnologıalyq, orta tehnologıalyq jáne joǵary tehnologıalyq bolyp bólinedi.
Mamandardyń aıtýynsha, balamaly jáne qosymsha komýnıkasıalardy qoldaný sóıleý men tildiń damýyna, sonyń ishinde sózdi túsinýge jáne ana tilin meńgerýge yqpal etedi. Olar bul baılanys ádisterin múmkindiginshe erterek engizýge keńes beredi.