Óńirlik komýnıkasıalar qyzmetiniń baspasóz konferensıasynda Almaty kásipkerlik jáne ınvestısıalar basqarmasynyń basshysy Erkebulan Orazalın óz isin jańadan bastaǵan kásipkerlerdi qoldaý sharalary týraly aıtty, dep habarlaıdy Almaty-akshamy.kz.
Almatyda kásipkerlerdi qoldaýǵa arnalǵan birneshe baǵdarlama bar. "Bıznestiń jol kartasy – 2025" baǵdarlamasynyń úshinshi baǵyty boıynsha isin jańa bastaǵan kásipkerlerge qaıtarymsyz negizde 5 mıllıon teńgege deıingi somada ınovasıalyq granttar beriledi.
"Búginde 510 mln teńgeniń 161 jobasyna qoldaý kórsetildi, onyń ishinde 326 mln teńgeniń 106 jobasyna halyqtyń áleýmettik osal toptary men kóp balaly analar qatysady", – dedi E. Orazalın.
Qolday kásipkerlik ortalyǵy bıznes-josparlardy daıyndaý úshin isin jańa bastaǵan kásipkerlerge jan-jaqty qoldaý kórsetedi.
Sondaı-aq "Almaty Business – 2021" baǵdarlamasy boıynsha tegin bilim berý men akselerasıa jobasy iske qosyldy. E. Orazalınniń aıtýynsha, akselerasıa baǵdarlamasy – bul SHOB úshin óz bıznesin sarapshylardyń kózimen qaraýǵa, ondaǵy álsiz jaqtardy tabýǵa, damý josparyn qurýǵa jáne satý men tabysty arttyrýǵa múmkindik beredi.
"Sarapshylarmen 8 apta ishinde jumys istegen kásipker tálimgerlik pen saraptamalyq qoldaý arqyly óz kásibiniń ósý núkteleri men tıimdiligin anyqtaıdy. 7 salalyq baǵytta, sonyń ishinde qyzmet kórsetý jáne ónerkásiptiń jekelegen túrleri salasynda jumys isteıtin 1 myńnan astam kásipkerdi qamtý kózdelgen", – dedi kásipkerlik jáne ınvestısıalar basqarmasynyń basshysy.
Aıta keterligi, qazirgi ýaqytta qala ekonomıkasynyń 45%-dan astamyn jeke kásipkerlik qalyptastyrady. 10 qala turǵynynyń 6-ýy shaǵyn jáne orta kásippen aınalysady. Qazaqstandaǵy árbir altynshy kásiporyn Almatyda ashylǵan.