Olar bızneske arnalǵan jeńildikterdi alyp tastaýǵa qarsy
Búgin Almaty qalasy kásipkerler palatasynyń alańynda kásipkerler jıyn ótkizip, Salyq kodeksine dıvıdendterdi salyq salýdan bosatý boıynsha jeńildikterdiń kúshin joıatyn túzetýge qarsylyqtaryn bildirdi, dep habarlaıdy Almaty-akshamy.kz Baq.kz siltema jasap.
«Almaty kásipkerleri Salyq kodeksine dıvıdendterdi salyq salýdan bosatý boıynsha jeńildikterdi alyp tastaıtyn jańa túzetýlerdiń engizilýine alańdaıdy. Kásipkerlerdiń pikirinshe, bul norma bızneske eki ese salyq salýyna alyp keledi, ınvestısıalardyń tıimdiligi men Qazaqstannyń ınvestorlar úshin tartymdylyǵyn tómendetedi», – dep atap ótti Almaty qalasy ÓKP dırektory Aıtýar Qoshmambetov.
Eske salsaq, 8 maýsymda Parlament Májilisi otyrysynda ekinshi oqylymda, shuǵyl zań jobasy aıasynda Salyq kodeksine túzetýler qabyldandy. Bul túzetýler shaǵyn jáne orta bıznes sýbektileri úshin dıvıdendterdi salyq salýdan bosatý túrindegi jeńildikterdi alyp tastaýdy kózdeıdi. Osylaısha, 2023 jyldan bastap rezıdent emester men jeke tulǵalarǵa tólenetin dıvıdendter (eger dıvıdendter somasy 30 000 AEK-ten asatyn bolsa) boıynsha jeńildikter alynyp tastalady.
Ulttyq palata mamandary Salyq kodeksine engizilgen túzetýlerge qatysty pikir bildirip, túzetýler qabyldanýy otandyq shaǵyn jáne orta bızneske teris áser etýi múmkin ekenin jáne engizýge neǵurlym júıeli qaraý qajettigin atap ótti.
«Dıvıdendterge salynatyn salyq qazir mynadaı tártipte tólenedi – eger kásipker kompanıany 3 jyldan az ýaqyt ıelense, onda dıvıdendter alǵan kezde ol 5% tóleıdi. Eger kompanıasyna 3 jyldan astam ýaqyt bolsa, dıvıdendterge salyq salynbaıdy. Qazir dıvıdendterge 10% mólsherleme belgileý usynyldy. Eger biz jańa Qazaqstannyń qarqyndy damýyn qalasaq, onda qosymsha salyqtar engizetin túzetýlerdiń kúshin joıyp, túsinikti Salyq kodeksin jasap, kodekske kem degende 3 jylǵa ózgerister engizýdi toqtatý qajet», – dep atap ótti Almaty qalasy ÓKP Óńirlik keńesiniń tóraǵasy Maksım Baryshev.