Atalǵan kásipti «maǵan da úıretshi» dep nıet tanytyp jatqandar kóp eken
Almaty oblysynyń turǵyny Jánibek Seıitov plasıkalyq bótelkelerden turmysqa qajetti zattar jasap shyǵarady. Ol bul kásip túrin ınternetten óz betimen úırengen. Búginde kásipkerdiń turaqty tutynýshylary da bar, dep habarlaıdy Almaty-akshamy.kz. QazAqparatqa silteme jasap.
Jánibek Seıitov Almaty oblysy Qaratal aýdany Úshtóbe qalasynyń turǵyny. Buǵan deıin taksıst bolǵan, bıyldan bastap jańa kásipti meńgerdi.
«Bul isti osy jyly qysta qolǵa aldym. Buǵan deıin plasıkalyq bótelkelerden túrli zattardy jasaýdy ınternetten kórip, sodan qyzyǵýshylyq týyndady. Basynda bir zat jasap kórdim, keıin aqyryndap kóbeıte bastadym. Plasıkalyq bótelkelerden jasalǵan zattardy kórgen tanystarym, kórshilerim meni qoldaı bastady. Sosyn aqyryndap jasaǵan dúnıelerimdi Instagram, Tik-Tok, YouToube jelilerine jarıa ettim. Ol jerde de qyzyǵýshylyq tanytyp, jyly pikir qaldyrǵandar kóp boldy», - dedi Jánibek Seıitov.
Ónertapqysh ázirge plasıkalyq bótelkelerden sypyrǵy men jip jasaıdy. Dese de aldaǵy ýaqytta basqa da zattar jasaý oıy bar.
«Jip jasaý ońaıyraq, tez bolady. Al sypyrǵy daıyndaý ýaqyt alady. Jalpy kúnine 4-5 sypyrǵyǵa deıin daıyndaı alamyn. Onyń ústine jipke qaraǵanda sypyrǵyǵa suranys basym bolyp tur. Bir sypyrǵyny 2 myń teńgege satyp jatyrmyn, al jip 200 teńge turady. Keıbir tutynýshylar 2 myń teńgeniń sypyrǵysyn qymbatsynyp jatady. Bul jerde másele paıdanyń astynda qalý emes, plasıkalyq bótelkeden sypyrǵy jasaý tehnologıasy qıyndaý jáne ol eńbek pen ýaqytty talap etedi. Tıisinshe baǵa da joǵarylaý. Plasıkalyq bótelkelerdi ózim izdep tabamyn. Kópqabatty úılerdiń qoqys konteınerleriniń janynda plasıkalyq bótelkelerge arnalǵan bólek jáshik bar, sol jerden jınap alamyn», - deıdi ol.
Úshqala turǵynynyń shaǵyn kásipkerlikti qolǵa alǵanyn estigen jergilikti ákimdik pen «Atameken» ulttyq kásipkerler palatasynyń ókilderi kásipkerge bıznestiń qyr-syryn úırene túsý úshin biliktiligin arttyrý kýrsynan ótýdi usynypty.
«Kelesi jyldyń basynda iskerlikti oqyp alýdy usyndy. Negizi buǵan deıin «Bıznes bastaý» baǵdarlamasy boıynsha oqyǵam, biraq emtıhannan óte almaı qaldym. Endi sony qaıtadan meńgerý múmkindigi týyp tur. Eger oqý sátimen bolsa 500 myń teńgeniń bıznes grantyn utyp alýǵa da bolady. Plasıkalyq bótelkelerden zattar jasaýǵa qatysty ıdeıa tolyp jatyr, biraq bári aınalyp kelip qarjyǵa tireledi. Sebebi ol úshin zamanaýı qurylǵy kerek, qazir neshetúrli stanoktar bar», - dedi jas kásipker.
Onyń aıtýynsha, atalǵan kásipti «maǵan da úıretshi» dep nıet tanytyp jatqandar bar eken.
«Bolashaqta armanym, osy plasıkalyq bótelkelerden zattar jasaý kásibimdi ulǵaıtyp, iri kásiporyn ashqym keledi. Qazir ne kóp, plasıkalyq qaldyq kóp, shıkizat jaǵynan problema joq. Sol sıaqty aldaǵy ýaqytta sypyrǵy men jipten basqa da zattar jasap shyǵarýdy josparlap otyrmyn», - deıdi ónertapqysh.