Ekonomıkany damytýǵa baǵyttalǵan 500 jobanyń ishinen 25 úzdik joba usynyldy
Almatydaǵy «Jas Otan» kovorkıng ortalyǵynda Creative Jastar jobasy aıasynda «Úzdik ınovasıalyq startaptar» baıqaýyna qatysýshylardyń máslıhat depýtatymen kezdesýi ótti, dep habarlaıdy Almaty-akshamy.kz.
Sondaı-aq jıyn barysynda «Atameken» Qazaqstan Respýblıkasynyń Ulttyq kásipkerler palatasy ókilderimen kezdesý bolyp, maketter kórmesi uıymdastyryldy.
Qazaqstan Respýblıkasy Táýelsizdiginiń 30 jyldyǵyna oraı «Qazaqstan jastary fraksıasy» QQ men «Jas Otan» Jastar qanaty birlesip uıymdastyrýymen jáne Almaty qalasy ákimdiginiń janyndaǵy Qoǵamdyq damý basqarmasynyń qoldaýymen «CREATIVE JASTAR» jobasy qolǵa alyndy.
«Úzdik ınovasıalyq startaptar» konkýrsyna qatysýshylar jobalarynyń kórmesi «Jas Otan» kovorkıng ortalyǵynda ótti. «Nur Otan» partıasynynyń Almaty qalalyq máslıhat depýtaty Qaırat Qudaıbergen jáne Almaty qalasy kásipkerler palatasynyń Almaly aýdandyq fılıalynyń dırektory Madıev Temirlan Haleluly, sondaı-aq kásipkerlikti qarjylaı emes qoldaý bóliminiń basshysy Ómirbaı Abzal Ǵalymuly konkýrsqa qatysýshylardyń jobalarymen tanysty.
İrikteýdiń birneshe kezeńinen ótken úzdik 25 qatysýshy qazylar alqasy, sarapshylar jáne demeýshiler aldynda 12 nomınasıa boıynsha óz jobalaryn qorǵady.
İs-shara barysynda jastardyń ınovasıalyq áleýetin damytýǵa, sondaı-aq elimizdiń kreatıvti ekonomıkasyn damytýǵa baǵyttalǵan 500 jobanyń ishinen 25 úzdik joba usynyldy.
Stomatologıalyq jáne medısınalyq trenajerlar óndirisi boıynsha jobalar, qaladaǵy ekologıalyq jaǵdaıǵa qarsy kúres boıynsha jobalar, ınovasıalyq aqyldy úı júıesi, bólmedegi aýany tazartýǵa arnalǵan brızer óndirisi, aldaǵy is-sharalar týraly aqparattandyrý úshin mobıldi qosymsha ázirleý, erekshe adamdarǵa arnalǵan ortalyq qurý , elde týrızmdi damytý boıynsha jobalar usynyldy.
Budan basqa, kórmege áleýetti ınvestorlar men demeýshiler ózderiniń startap jobalaryn odan ári iske asyrý maqsatynda qatysty.