Almaty qalasy Balalar shuǵyl medısınalyq kómek kórsetý ortalyǵynyń hırýrgtary kenet pnevmotorakspen túsken jasóspirimge ota jasady.
Pnevmotoraks - ókpe men keýde qýysy arasyndaǵy keńistikte aýanyń jınalýy. Onyń sebebi jaraqat, ókpeniń perforasıasy nemese ınfeksıa bolýy múmkin. Pnevmotoraks ókpeniń aýamen qysylýyna baılanysty keýdedegi shydamsyz aýyrsynýdy, entigýdi jáne basqa belgilerdi týdyrady, dep habarlaıdy almaty-akshamy.kz.
«Naýqas sol jaqta kenet pnevmotoraks, birinshi dárejeli tynys jetkiliksizdigi dıagnozymen shuǵyl túrde tústi. Balanyń jaǵdaıy aýyr dep baǵalandy. Ókpede sol jaqta kúrt álsiregen, oń jaqta qatań tynys baıqaldy. Qatty entigý oryn aldy. Bala aýrýhanaǵa jatqyzylyp, bul jaǵdaıdyń sebepterine zerthanalyq jáne aspaptyq zertteýler júrgizile bastady», - deıdi Almaty qalasy Balalar shuǵyl medısınalyq kómek kórsetý ortalyǵynyń dırektory Álibek Smaǵulov.
Aýrýhana jaǵdaıynda dárigerlerge Búalý ádisimen plevra qýysyn drenajdaý - keýde qabyrǵasyna kishkene tilik arqyly drenajdy tútiksheni engizý arqyly aýany shyǵarýǵa týra keldi. Drenajdyq tútik suıyqtyqty nemese aýany plevra qýysynan shyǵarýǵa múmkindik beredi, qalypty qysym men ókpe kólemin qalpyna keltiredi. Búalý boıynsha drenaj tek jedel járdem nemese aýrýhanada tájirıbeli hırýrg pen reanımatologtardyń qatysýymen júzege asyrylady. Bul shara ókpe jaǵdaıyn aýyrlatýdy boldyrmaý jáne qalypty tynys alýdy qamtamasyz etý úshin qajet boldy.
Balanyń jaǵdaıy turaqtanǵannan keıin KT jasaldy, onda «3-qabyrǵanyń aldyńǵy segmenti deńgeıinde 1,9 sm, sol jaq ókpeniń S3 bóligine enetin jiti súıek ósýi» anyqtaldy. Bul patologıa ekzostoz dep atalady jáne óte sırek kezdesedi. Máselen, Ortalyqtyń hırýrgıalyq qyzmetiniń 60 jyldyq tarıhynda bul balada bolǵan ekzostozdyń alǵashqy klınıkalyq jaǵdaıy. Ortalyqtyń eń tájirıbeli degen hırýrgtarynyń buǵan deıin qabyrǵa ekzostozyna ota jasaý tájirıbesi bolmaǵan.
Hırýrg mamandarǵa súıek tinin alyp tastap, ókpedegi jylankózdi tigip, ókpeqap qýysyna bilte qoıyp, tekserýge eki saǵat qajet boldy. Ota sátti ótti.
«Qorytyndy dıagnoz kelesideı boldy: sol jaqta 3-qabyrǵanyń ekzostozy, sol jaq ókpeniń joǵarǵy bóligindegi jylankóz, sol jaqta pnevmotoraks. Balanyń bul isikpen qansha ýaqyt júrgenin naqty aıta almaımyz, biraq ýaqyt óte kele ókpede oıylǵan jer paıda boldy, sodan keıin jylankóz (sańylaý) paıda boldy, osy sebepti naýqasta pnevmotoraks jáne tynys alý jetkiliksizdigi oryn aldy. Osy ýaqytqa deıin ekzostoz ony mazalaǵan joq. Rentgendik zertteý bul patologıany kórsetpeıdi. Bizdiń Ortalyqta balanyń dene erekshelikterine sáıkes arnaıy KT apparaty bar. Kompúterlik tomografıanyń jáne rentgenologıa bólimindegi áriptesterdiń kómegimen aýrý sebebin anyqtadyq», - deıdi Almaty qalasy Balalar shuǵyl medısınalyq kómek kórsetý ortalyǵynyń hırýrgi Jalǵas Kúnıazov.
Balalarda qabyrǵa ekzostozy (nemese osteohondroma) qatersiz isik bolyp tabylady. Ol aýyrsyný men yńǵaısyzdyqty týdyrýy múmkin, sırek jaǵdaıda qabyrǵa ekzostozy keýde qýysynyń qalypty qozǵalysyn shekteıdi, bul tynys alý problemalaryna ákelýi múmkin. Qabyrǵa ekzostozy ádette balalar men jasóspirimderde kezdesedi jáne salystyrmaly túrde sırek kezdesetin qubylys bolyp sanalady.