Almatylyq dárigerler kózine metal synyǵy kirgen jas jigittiń kórý qabiletin saqtap qaldy. Ortalyq qalalyq klınıkalyq aýrýhana mamandary qabyldaý bólimine kóz almasynyń jaraqatymen túsken adam ómirin qutqardy.
Naýqastyń aıtýy boıynsha, jaraqatty úı jaǵdaıynda alǵan, jıhazǵa arnalǵan qurylǵynyń metal skobasy kózine kirip ketken.
Oftolmologıa bólimshesiniń meńgerýshisi Gúlzat Abdraımovanyń aıtýynsha, bundaı jataqat kóz almasynyń jyrtylýyna, kóz lınzasynyń yǵysýyna, katarakta, glaýkoma, kózdiń shyny tárizdes qabatyna qan jınalýy nemese tordyń zaqymdalýyna (qan quıylý, isiný, ajyraý) ákelýi múmkin.
Qajetti bolǵan barlyq tekseristen keıin dárigerler kóz ishine túsken zatty shyǵaryp alyp jaraqat ornyn tigý otasyn asqan sheberlikpen jasap shyqty.
«Ota sátti ótti, otadan keıin naýqastyń kóziniń kórý qabileti tolyqtaı saqtaldy. Kózge kirgen artyq zatty alyp tastaǵan soń, biz naýqas kóziniń torly qabatyna lazerlik koagýlásıa jasadyq, sebebi atalǵan otadan keıin naýqasta kózdiń kórý qabileti tómendep ketý qaýpi boldy»,- deıdi dáriger.
Kózdiń torly qabatyna jasalatyn lazerlik koagýlásıa - torly qabattyń zaqymdanǵan tusyn núktelik ádis arqyly lazermen nyǵaıtý. Lazer tindi qyzdyrady, áser etý ornyndaǵy aqýyz ydyraıdy, koagýlánttar («jelim núkteleri») paıda bolady jáne osylaısha membranalar bir-birine jabystyrylady.
Osylaısha kózdiń torly qabyǵy nyǵaıtylady, zaqymdanǵan jerdiń qan aınalymy men nárlenýi jaqsarady, tin arasyna suıyqtyq ótýiniń aldy alynady.
Ortalyq qalalyq klınıkalyq aýrýhanada mundaı otany jasaý úshin zamanaýı qurylǵylar bar, olar túrli dárejedegi kóz aýrýyn emdeýde ozyq nátıjelerge jetýge múmkindik beredi.
«Kóp jaǵdaıda alyp tastaýdy qajet etetin zattar kózge aýyl sharýashylyǵy, qurylys jumystary, slesarlyq jáne aǵash zattarmen jumys isteý kezinde kiredi. Sol sebepten de men jumys isteý barysynda qaýipsizdik erejelerin saqtap, qorǵanysh kózildirigin kıýdi usynamyn», - dep qorytyndylady dáriger.