Aýylda kadrlardy bekitý - mańyzdy másele.
Bıyl aýyldyq eldi mekenderge medısınalyq bilimi bar 797 túlek jiberildi. Bul týraly Densaýlyq saqtaý mınıstri Ajar Ǵınıat aıtty, dep habarlaıdy Almaty-akshamy.kz QazAqparatqa silteme jasap.
«Densaýlyq saqtaý salasyn reformalaý jyldarynda aýyldarda aýrýhanalar jabylyp, kereýetter qysqardy. Soǵan baılanysty aýyldarda medısına mamandarynyń sany azaıa bastady. Búginde aýylda kadr tapshylyǵy saqtalýda. Osy jyldyń basynda ol shamamen 1 myń mamandy qurady. Sonymen qatar aýyldyq jerlerde profılaktıka, aýrýdyń aldyn alý, dınamıkalyq baqylaý sapasy tómen, sozylmaly aýrýlary bar pasıentterge konsýltasıalyq-dıagnostıkalyq qyzmetter, dári-dármek qoljetimdiligi az», - dedi mınıstr Ortalyq komýnıkasıalar qyzmetindegi baspasóz máslıhatynda.
Onyń atap ótýinshe, bul halyq densaýlyǵynyń keıbir kórsetkishterine teris áser etedi. Osy problemany eskere otyryp, aýyldyq medısına boıynsha óńirlik ákimdiktermen jumys júrgizilip jatyr.
«Aýylǵa medısına kadrlaryn tartý máseleleri boıynsha memlekettik bilim berý tapsyrysy esebinen medısınalyq mamandyqtarda bilim alǵan jastar úsh jyl mindetti jumys merzimin óteıdi. Bul norma «Bilim týraly» zańǵa 2012 jyly engizilgen. Aýylda jumysqa ornalasqan medısına qyzmetkerlerin qoldaý maqsatynda respýblıkalyq búdjetten 100 aılyq eseptik kórsetkish mólsherinde kóterme járdemaqy jáne 1 500 aılyq eseptik kórsetkish mólsherinde baspanaly bolýǵa járdemaqy kózdelgen. Sonymen qatar, jergilikti búdjetten eldi mekenderdegi mamandardy yntalandyrý maqsatynda ár dárigerge 1-2 mıllıon teńge kóleminde qarajat bólinedi. Atap aıtqanda, Qostanaı oblysy ákimdigimen 5 mıllıon, Soltústik Qazaqstan oblysy ákimdigimen 3 mıllıon teńgege deıin kóterme tólemder tólenedi. Nátıjesinde 2020-2021 jyldary aýyldyq densaýlyq saqtaý uıymdaryna 1 322 túlek jumysqa ornalasty. Ol jumysqa tartylǵandardyń 94 paıyzyn quraıdy. Bul mınıstrliktiń ákimdiktermen birlesken jumysynyń kórsetkishi sanalady. Bıyl aýyldyq eldi mekenderge medısınalyq bilimi bar 797 túlek joldandy. Bul jerde aýylda kadrlardy bekitý mańyzdy másele. Sondyqtan medısınalyq kadr tapshylyǵyn tómendetý maqsatynda jergilikti ákimdikter kadrlardy tartý jáne áleýmettik qoldaý jumystaryn kúsheıtip, jalǵastyrý qajet», - dedi Ajar Ǵınıat.