Almatydaǵy №1 qalalyq klınıkalyq aýrýhananyń ambýlatorlyq hırýrgıa ortalyǵynda bir aıda 20 shaqty shaǵyn ota jasaldy
Qalalyq klınıkalyq aýrýhananyń ambýlatorlyq hırýrgıa ortalyǵy mamandary 73 jastaǵy zeınetkerdiń moınyndaǵy lıpomany alyp tastady, dep habarlaıdy Almaty-akshamy.kz aýrýhananyń baspasóz qyzmetiniń aqparatyna súıenip.
Habarlamaǵa súıensek, pasıenttiń jelkesindegi isik jıyrma jyldan astam ýaqyt buryn paıda bolǵan.
«Tompaıyp kózge qorash kórinetini bolmasa esh aýyrǵan joq. Buryn túrli sebeptermen ota jasata almaı júrdim. Jaqynda tanystardan isikti mindetti áleýmettik medısınalyq saqtandyrý esebinen tegin jasatýǵa bolatynyn estip, aýrýhanaǵa keldim», - deıdi zeınetker.
Pasıentke ambýlatorıa deńgeıinde josparly ota jasaldy. Jergilikti jansyzdandyrý arqyly jasalǵan shaǵyn hırýrgıalyq manıpýlásıa 20 mınýtta aıaqtaldy. Operasıanyń ornynda biliner-bilinbes tyrtyq qaldy.
Ortalyq jetekshisi Marat Menaıaqovtyń aıtýynsha, operasıa jasaý úshin belgili bir analızder men tekserý nátıjeleri talap etiledi. Qajetti saraptamalardan keıin pasıentke birden ota jasalady. Iaǵnı, ol úshin aýrýhanaǵa jatyp emdelýdiń qajeti joq.
«Pasıenttiń moınyndaǵy isikten bıopsıa alyndy. Nátıjesinde onyń maıdan túzilgen lıpoma ekeni anyqtaldy. Jalpy, mundaı isikterge ota jasalǵannan keıin pasıent birneshe saǵattan soń úıine qaıtady. Sodan soń eki kúnde bir ret jarasyn tańdyrýǵa kelip turady. Tigistiń jibi 10-12 kúnnen keıin alynady», - dedi hırýrg.
Alaıda, mamandar onyń ártúrli faktorlar saldarynan qaterli isikke aınalyp ketýi ábden múmkin ekenin aıtady. Sondyqtan mundaı isikterdi der kezinde alyp tastaǵan jón.
№1 qalalyq klınıkalyq aýrýhana janyndaǵy ambýlatorlyq hırýrgıa ortalyǵynda ashylǵaly beri bir aıǵa jýyq ýaqyt ishinde osyǵan uqsas 20 shaqty shaǵyn ota jasaldy. Hırýrgıalyq kómek mindetti áleýmettik medısınalyq saqtandyrý sheńberinde jáne aqyly negizde kórsetiledi. Hırýrgter lıpoma, ateroma, gıgroma syndy taǵy da basqa qaýipsiz isik túrlerine, shaptaǵy jáne kindik tusyndaǵy jaryqtarǵa operasıa jasaıdy, varıkozdy emdeıdi.
«Ambýlatorlyq hırýrgıa ortalyqtary azamattar úshin óte yńǵaıly. Pasıent mundaı ortalyqtarda ota jasatý úshin asa kóp analız tapsyrmaıdy. Onyń ústine, saqtandyrylǵan azamattar tıisti saraptamalardy tirkelgen emhana arqyly tapsyryp, ınstrýmentaldyq zertteýlerden de MÁMS sheńberinde óte alady», - deıdi Medısınalyq saqtandyrý qorynyń Almaty qalalyq fılıaly dırektory Tileýhan Ábildaev.