Dintaný salasyndaǵy sarapshy Almasbek Shaǵyrbaı dindarlardy vaksınalanýǵa qatysty jalǵan aqparattan saqtandyrady.
Bul týraly ol Almaty qalasynyń Óńirlik komýnıkasıalar qyzmetinde ótken brıfıńte málimdedi, dep habarlaıdy Almaty-akshamy.kz
Dintanýshy, aqparattyq-túsindirý tobynyń múshesi, Qazaqstan Respýblıkasy Bilim jáne ǵylym mınıstrligi Ǵylym komıteti fılosofıa, saıasattaný jáne dintaný ınstıtýtynyń jetekshi ǵylymı qyzmetkeri Almasbek Shaǵyrbaı dindarlarǵa vaksınalaný týraly qaýesetter men boljamdardyń áser etetinin aıtty. Vaksınaǵa qarsylar adam aǵzasyna kez kelgen ekpe salýdy tózgisiz sanaıdy. Bul, árıne teris pikir.
Almasbek Shaǵyrbaı ekpeden nemese qan quıýdan bas tartatyn azamattardyń, kerisinshe, dinnen bas tartatynyn, sonyń saldarynan adam ólimi bolatynyn atap ótti.
«Islamda adam ómiri men densaýlyǵynan joǵary qundylyq joq degen pátýa bar. Sondyqtan árkim óz densaýlyǵyna erekshe nazar aýdarýy kerek. Alla Taǵala adamnyń ózine saqtanýdy buıyrady. «Saqtansań – saqtaımyn» degen naqyl osyny bildiredi», - deıdi dintanýshy.
Almasbek Shaǵyrbaı musylman ǵalymdardyń, eger adam ólim men ómir arasynda tursa, ony ajaldan qutqarý úshin keıde tyıym salynǵan áreketterge de barýǵa bolady degen qaǵıdalaryn eske saldy. Óıtkeni, mundaǵy basty maqsat – adam ómirin saqtap qalý.
«Vaksınada dinı turǵydan tyıym salynǵan eshteńe joq. Ony halal nemese haram dep bólý durys emes», - dedi Almasbek Shaǵyrbaı.
Almatylyq sarapshy dindarlardy teris qaýesetke senbeýge, tek medısınalyq mamandar bergen ári rastalǵan aqparatty zerdeleýge shaqyrdy. Almasbek Shaǵyrbaıdyń aıtýynsha, koronavırýstyq ınfeksıadan qorǵaný úshin densaýlyqty saqtaý, vıtamınderdi qabyldaý jáne ekpe alý qajet.