Armanjan Baıtasov almatylyqtardy vaksınalanýǵa shaqyrady: «Vırýspen soǵys júrip jatyr, bizde qarý bar – bul vaksına»
Almaty epıdemıologıalyq ahýal boıynsha «qoıý qyzyl» aımaqta tur. Ótken táýlikte megapolıste koronavırýstyq ınfeksıaǵa PTR oń nátıje bergen 1 555 pasıent anyqtaldy, dep habarlaıdy Almaty-akshamy.kz.
Infeksıanyń taralýyn azaıtý maqsatynda turǵyndardy tegin vaksınalaý jalǵasýda. Qalada medısınalyq uıymdarda, mektepterde, mádenıet jáne sport obektilerinde, bazarlarda jáne qalanyń SOSO-da 160 ekpe pýnkti bar (250-ge deıin ulǵaıtý múmkindigimen). Sondaı-aq, 1 028 adamnan turatyn 237 vaksınasıa brıgadasy jumyldyrylǵan.
Nur Otan partıasynan Almaty máslıhatynyń depýtaty Armanjan Baıtasov almatylyqtardy vaksınalanýǵa shaqyrady.
«Men vaksınany buryn alǵanmyn. Vaksına kez kelgen aýrýdan nemese vırýstan qorǵanýdyń eń tıimdi ádisi dep oılaımyn. Vaksına jasaý – bul jeke jaýapkershilik máselesi, sebebi eger siz vaksınalanǵan bolsańyz, sizde qorǵanysh bar: aýyrmaısyz jáne eń bastysy, basqa adamdarǵa qaýip tóndirmeısiz», - dedi Armanjan Baıtasov.
A. Baıtasov ınfeksıalyq gospıtálde kórgenderimen de bólisti.
«Men aýrýhanada boldym, ottegi jetispeıtin, dem ala almaı jatqan adamdardyń qalaı ózderin nashar sezinetinin kórdim. Bul jaǵdaıǵa qaraýdyń ózi aýyr. Sondyqtan qazir vırýspen soǵys júrip jatqandyǵyn jáne bizde vaksına degen qarýdyń baryn túsiný kerek. Vaksına ózińdi, otbasyńdy, dostaryńdy qorǵaıdy», - dedi ol.
Aıta keterligi,qazirgi ýaqytta Almatyda epıdemıologıalyq ahýal ýshyǵyp tur. Epıdemıologtardyń málimetinshe, eń joǵary juqtyrý burynǵydaı 20-39 jas aralyǵyndaǵy turǵyndar arasynda tirkelgen – 35,6%