№7 qalalyq klınıkalyq aýrýhanaǵa jetkizilgen 42 jastaǵy naýqas oń jaq qolyndaǵy ekinshi saýsaǵyn bala kúninde jaraqattap alǵan. Sodan beri ondaǵan jyl boıy saýsaǵynyń basy qatty aýyryp, ary qaraı shyntaq, ıyq pen jaýyrynda aýyrsyný paıda bolatyn. Janyn jegideı jegen aýrý saldarynan naýqas jumys isteý bylaı tursyn, oń qolyn qozǵaltýdan qalǵan.
Osy ýaqyt ishinde talaı klınıkanyń tabaldyryǵyn tozdyrǵanmen, ártúrli dıagnoz qoıylyp, emnen eshbir nátıje bolmapty. Barre-Masson isigi degen naqty dıagnozdy jetinshi aýrýhananyń Neırohırýrgıa ortalyǵy mamandary qoıdy.
Aýrýhana neırohırýrgteri saýsaqqa mıkrohırýrgıalyq jolmen ota jasap, isikti alyp tastady. MÁMS arqyly qarjylandyrylǵan biregeı operasıany neırohırýrg mamandar Álıhan Halımov, Baqyt Aǵlaqov, Altaı Anarbaı, Bekturǵan – Úsen Beksultan jasady.
«Óskin tyrnaqtyń astyna shyqqandyqtan tyrnaqty alyp tastaýǵa týra keldi. Aınalasyndaǵy tinderge tyǵyz bitken isik tehnıkalyq qıyndyqtar týdyrdy, degenmen biz ony tolyq kesip alyp tastadyq. Ota nátıjesi de tańqaldyrdy, operasıadan keıin saýsaqtaǵy ǵana emes, shyntaq, ıyq pen jaýyrynnyń aýyrǵany da birden basyldy. Saýsaǵynyń ushyna birdeńe tıip ketse jany kózine kórinip, jyldar boıy sonyń zardabyn tartyp kelgen pasıenttiń qýanyshynda shek joq», - deıdi 40 jyldyq ótili bar tájirıbeli neırohırýrg Álimhan Halımov.
Aıtýynsha, Barre-Masson isigi – sırek kezdesetin derttiń biri. Ol 20 men 50 jas aralyǵyndaǵy naýqastardyń 1-5 prosentinde ǵana bolady eken. Teriniń tamyr shýmaqtarynan quralatyn isik ádette, saýsaqtyń tyrnaq bóligine shyǵady, deıdi maman.
Taǵy bir aıta keterligi, bul dertti anyqtap, naqty dıagnoz qoıý qıyn. Sırek kezdesetindikten ári ózine tán belgilerine baılanysty kesh, paıda bolǵan sátten bastap shamamen 7 jyldan keıin ǵana anyqtalyp jatady. Álemde naqty dıagnozy 40 jyldan keıin qoıylǵan jaǵdaılar da bar, sondyqtan Barre-Masson isiginiń dıagnostıkasy kúrdeli problema bolyp qalyp otyr, deıdi maman.